Har qanday islohotning kelajagi maktab taʼlimi bilan bog‘liqligi bugun hech kimga sir emas. Chunki qanchalik zo‘r rejalar tuzilmasin, inson uni amalga oshiradi, rivojlantiradi. Insonni esa faqat taʼlim tarbiyalaydi.

Hozirgi o‘zgarishlar jarayonida eng muhim va taʼsirli qadam o‘qituvchiga bo‘lgan eʼtiborning oshayotganidir. Aslida jamiyatni o‘zgartirishni istagan odam avvalo o‘qituvchini qo‘llab-quvvatlashi lozim. Chunki bu kasb egalari barcha zamonlarda eʼzozlangan, hurmati joyiga qo‘yilgan.

Ota sifatida doimo o‘ylayman: farzandlarim qanday muhitda o‘sayapti? Ularga bilim berayotgan ustoz qanday sharoitda ishlayapti? Bu savollar bugun har birimizni o‘ylantirishi lozim.

Eʼtibor bering, Yangi O‘zbekistonda pedagog kadrlar tayyorlash, ularni zamonaviy talablarga moslashtirish, xalqaro tajriba asosida qayta tayyorlash, ularning haqiqatda munosib hayot kechirishini taʼminlashga katta eʼtibor qaratilmoqda. Bu o‘zgarishlar uzoq yillar davomida jamiyatda “o‘qituvchi qadrsiz” degan og‘riqli tushunchani yo‘q qilishga xizmat qildi.

Yana bir eʼtiborli jihati: iqtidorli bolalarni saralab, tayyorlash tizimi. Bu oddiy qilib aytganda, eng bilimli bolalarning yo‘ldan adashmasligi, o‘z salohiyatini to‘liq namoyon eta olishiga sharoit yaratish demakdir. Har bir bola bir olam – unga to‘g‘ri muhit, to‘g‘ri ustoz va to‘g‘ri yo‘l kerak. Shu bilan birga, bugungi maktab, endi bolaga faqat bilim emas, hayotga ham tayyorlashi kerak.

Yig‘ilishda to‘garaklar, sayohatlar, texnologiyaga oid mashg‘ulotlar haqida aytilgan rejalardan shuni angladimki, zamonaviy maktab nafaqat o‘quvchi bilimini oshiradi, balki uning ko‘nikmalari, dunyoqarashini kengaytiradi, rivojlantiradi.

Endigi vazifa joylarda bu tashabbuslarning targ‘ibotini to‘g‘ri olib borish, ularni yurakdan qabul qilish va vijdonan amalga oshirish. Har bir tuman rahbari, maktab direktori, mutasaddilarning harakati bu islohotning natijasini belgilaydi.

Ishonchim komil: agar o‘qituvchilar biz kutgandek qo‘llab-quvvatlansa, yoshlarimiz uchun milliy va zamonaviy ruhda yangi imkoniyatlar yaratilsa, uning natijasi nafaqat taʼlimda, balki butun jamiyatda seziladi. Va shunda biz “Yangi O‘zbekiston”ni “yangi maktab”lar orqali barpo etamiz.

Maxsud MUHAMMEDOV
Oliy Majlis Qonunchilik palatasidagi
“Milliy tiklanish” fraksiyasi aʼzosi