“Dunyoda isbot talab qilmaydigan bir haqiqat bor: har qanday mamlakat taraqqiyoti sog‘lom va bilimli avlodga bog‘liq”. Ayniqsa, bilimli, vatanparvar va maʼnaviy yetuk yoshlarni tarbiyalash har qanday jamiyatning eng dolzarb vazifasiga aylangan. Shu bois, Prezidentimiz raisligida o‘tkazilgan yig‘ilishda taʼlim va tarbiya tizimidagi islohotlar, muammolar aniq raqamlarda ochiq muhokama qilindi.

O‘tgan ikki yilda 289 ta maktabda 10-sinf o‘quvchilariga 60 dan ortiq kasblar o‘rgatila boshlagani, 114 ta maktabga tadbirkorlar biriktirilib, 4 mingdan ortiq yoshlarning 2 milliondan 5 million so‘mgacha daromad olayotgani – bu nafaqat iqtisodiy, balki tarbiyaviy jihatdan ham muhim natijadir.

Shu bilan birga, bog‘cha tarbiyachilarining oyligi 65 foizga oshirilib, maktab o‘qituvchilari bilan tenglashtirilgani – maktabgacha taʼlimni bolalarning ilk maʼnaviy va intellektual shakllanish bosqichiga aylantirmoqda. Til bilish, fan olimpiadalari va yangi baholash tizimi asosida 60 mingga yaqin ustozning 8–12 milliongacha maosh olayotgani esa o‘qituvchilik kasbining shaʼni tiklanayotganidan dalolat.

Biroq haligacha yechimini kutayotgan masalalar bor. Shu sabab, Maktabgacha va maktab taʼlimi tizimiga “favqulodda to‘qson kunlik” rejimda ishlash topshirilgani bu tizimda tub burilish boshlanganidan dalolat beradi. Ayniqsa, aniq va tabiiy fanlar bo‘yicha pedagoglar yetishmasa, IT, sunʼiy intellekt, “yashil” energetika kabi istiqbolli sohalarga kadr topish qiyinlashadi.

“Milliy tiklanish” demokratik partiyasi o‘zining Saylovoldi dasturida taʼlim-tarbiya tizimini isloh qilishni bosh vazifa deb belgilagan. Chunki biz ishonamiz: maʼnaviy tiklanish – avvalo taʼlimdan boshlanadi. Maʼnaviyatsiz bilim, Vatanga muhabbatsiz kasb, qadriyatlarsiz taraqqiyot bo‘lmaydi! Shuningdek, yoshlarimizni zararli axborotlardan himoya qilish, sog‘lom milliy kontent taklif etish, ijodkorlarni qo‘llab-quvvatlash borasida professional tizimni yaratish ham bugunning dolzarb masalasidir.

Xalqimizning har bir farzandi biz uchun bebaho boylikdir. Ularning tarbiyasi, taʼlimi, orzu va intilishlari – bu Yangi O‘zbekistonning ertangi surati. Biz esa bu surʼatni maʼnaviyat, qadriyat va ilm bilan to‘ldirish tarafdorimiz!

Hamidjon OMANOV,
partiyaning Andijon viloyat Kengashi raisi