Davlatimiz rahbari raisligida taʼlim masalasida o‘tkazilgan videoselektor yig‘ilishida alohida urg‘u berilgan muhim jihatlardan biri bu – pedagogik kadrlar tayyorlash tizimini tubdan qayta ko‘rib chiqish masalasi bo‘ldi. Nizomiy nomidagi oliygohning Milliy pedagogika universitetiga aylantirilgani, Termizdagi institut misolida fakultetlar o‘rnida oliy maktablar tashkil etilishi, o‘quv yuklamasining 20 foizga qisqarishi... Bularning barchasi zamonaviy talablar asosida raqobatbardosh, metodik jihatdan puxta tayyorgarlikka ega o‘qituvchilarni yetishtirishga xizmat qiladi.

Eʼtiborga molik jihatlardan yana biri: “Prezident iqtidorli farzandlar” dasturi va Al-Beruniy nomidagi xalqaro maktab tashkil etiladi. Bu tashabbus, avvalo, eng salohiyatli yoshlarni maqsadli tayyorlash, ularni jahondagi eng nufuzli universitetlarga yo‘naltirish orqali mamlakatimizda intellektual salohiyatni mustahkamlashga xizmat qiladi.

Bundan tashqari o‘quvchilarning bo‘sh vaqtini mazmunli tashkil etish, turizm, xorijiy tillar, sunʼiy intellekt, animatsiya kabi zamonaviy to‘garaklar orqali ularni har tomonlama rivojlantirishga yo‘naltirish – bu taʼlimga faqat bilim emas, balki shaxsiy kamolot vositasi sifatida qaralayotganini ko‘rsatadi.

Prezident tomonidan bolalarni zararli axborotlardan himoya qilish masalasi ham bejiz tilga olinmadi. Bolalar kontentini rivojlantirish markazi faoliyati orqali endilikda mahalliy, milliy qadriyatlarga asoslangan, estetik va maʼnaviy jihatdan boy kontentlar ishlab chiqiladi.

Taʼkidlash lozim, yig‘ilishda ilgari surilgan taklif va tashabbuslar, belgilangan vazifalar nafaqat bugungi taʼlim tizimining muammolariga yechim bo‘lib xizmat qiladi, balki butun bir yangi avlodni – kelajak yetakchilarini tarbiyalashda mustahkam poydevor bo‘ladi. Buning uchun har bir soha vakili, har bir ota-ona va eng muhimi, har bir pedagog bu islohotlarda faol ishtirok etishi zarur.

Alisher ARIPOV,
Markaziy kengash bo‘lim boshlig‘i