Maktabgacha va maktab taʼlimiga bag‘ishlangan videoselektorda Prezidentimiz tomonidan hayot-mamot masalasi – taʼlimni rivojlantirish bo‘yicha bildirilgan fikrlar, taklif va tashabbuslar, shubhasiz, o‘zini millat taqdiriga dahldor bilgan hech bir yurtdoshimizni beeʼtibor qoldirmaydi. Aksincha, o‘ylashga, amaliy choralar ko‘rishga undaydi.

Davlatimiz rahbari Yangi O‘zbekistonni barpo etish yo‘lida sog‘lom, bilimli, teran fikrli, vatanparvar yoshlarni tarbiyalash uchun zarur bo‘lgan barcha sharoitlarni yaratish shartligi va zarurligini qatʼiy taʼkidladilar.

Darhaqiqat, keyingi yillarda barcha sohalarda ulkan islohotlar amalga oshirilmoqda. Uchinchi Renessans poydevorini qurish, Inson qadri ustuvor bo‘lgan Yangi O‘zbekistonni barpo etish bugun oldimizda turgan dolzarb vazifa ekan, bu shubhasiz, taʼlim va tarbiya bilan uzviy bog‘liq.

Yig‘ilishda Prezidentimiz taʼlim tizimidagi yutuqlar, yangiliklarni eʼtirof qilgan holda, muammolarga ham to‘xtaldi. Bolalarning matematika va tabiiy fanlar bo‘yicha bilim darajasini oshirish, taʼlim mazmunini zamonaviy talablarga moslashtirish, o‘quv dasturlari va darsliklarni qayta ko‘rib chiqish, taʼlim metodlarini yangilash borasidagi taklif va topshiriqlar kelgusi avlodning raqobatbardosh, bilimli va salohiyatli bo‘lishi uchun asos bo‘ladi.

Maʼlumki, har qanday taʼlim islohoti avvalo o‘qituvchi sifatiga bog‘liq. Shu bois, pedagoglarning malaka oshirish tizimi tubdan yangilanishi ko‘zlanayotgan marralarga erishishda muhim ahamiyat kasb etadi.

Videoselektorda taʼlim jarayoniga ota-onalar va mahalla institutlarini keng jalb qilish zarurligi ham taʼkidlandi. Darhaqiqat, taʼlim faqat maktab bilan cheklanib qolmasligi, balki oila va jamiyat bilan uzviy bog‘liq bo‘lishi kerak. Ota-onalarni farzand taʼlimiga daxldor qilish orqali ko‘proq ijobiy natijalarga erishish mumkin.

Yig‘ilishda berilgan topshiriqlar taʼlim sohasidagi yangi bosqichning boshlanishi desak, mubolag‘a bo‘lmaydi. Prezident tomonidan bildirilgan fikrlar, berilgan topshiriqlar nafaqat mavjud muammolarga yechim, balki kelajak uchun aniq strategik yo‘nalish hamdir. Bu islohotlar izchil amalga oshirilsa, O‘zbekiston taʼlim tizimi xalqaro mezonlarga moslashgan, raqobatbardosh va barqaror tizimga aylanishi shubhasiz.

Gulsara QURBONBOYEVA,
Xalq deputatlari Xorazm viloyati Kengashi deputati