“Dunyoda shunday ulug‘ insonlar borki, ularga ikki dunyo saodati tayin”, deydi dono xalqimiz. Avvalo solih farzand tarbiyalagan ota-ona, keyin ulug‘ savob egalari – qalb ko‘zlarini ochgan, dillarga ezgulik urug‘ini qadagan ustoz, muallimlardir. Men ham ana shunday ulug‘ kasb egasi ekanligimdan faxrlanaman.

Prezidentimiz Shavkat Mirziyoyev raisligida 15-may kuni o‘tkazilgan videoselektor yig‘ilishida maktab taʼlimi tizimidagi islohotlar samaradorligini yanada oshirish bo‘yicha belgilangan vazifalarni o‘qib, xursand bo‘ldim. Davlatimiz rahbari tomonidan ilgari surilgan taklif va tashabbuslar, shubhasiz, taʼlim tizimida yangi bosqichni boshlab beradi.

Yangi O‘zbekiston islohotlari, taraqqiyot odimlari taʼlim sohasi xodimlarini ham o‘z ustida yanada ko‘proq ishlashga undamoqda. Boisi, bir kun izlanishdan to‘xtagan pedagog zamondan ortda qoladi desak mubolag‘a bo‘lmaydi, ayniqsa, bugungi tezkor o‘zgarishlar davrida. Chunki yosh avlodning ongi, tafakkuri juda tez o‘smoqda. Ular Internet orqali dunyoda kechayotgan voqea-hodisalar, eng muhimi, ilm-fan yangiliklaridan tezkor boxabar bo‘lib borayotir. Shu maʼnoda, pedagoglar ham tinimsiz izlanib, o‘z ustida ishlamas ekan, darslarda o‘quvchilarning kutilmagan savollari oldida noqulay ahvolga tushib qolishi hech gap emas.

Demak, biz – pedagoglar har kuni, har soniyada bilimlarimizni yanada oshirish, mahoratimizni charxlash uchun tinimsiz harakatda bo‘lishimiz zarur. Zamonaviy texnologiyalar xizmatidan samarali foydalangan holda, har bir darsimizga yangilik olib kira olsakkina, bolalar bizni tinglaydi, fanimizga qiziqish bildiradi. Shu bois, videoselektorda yangi avlod pedagoglarni tayyorlash va malakasini oshirish bo‘yicha ham vazifalar belgilandi.

Jumladan, bu borada Avloniy malaka oshirish instituti transformatsiya qilinib, uning 13 ta hududiy markazi qayta tashkil etiladi. Nizomiy oliygohi – Milliy pedagogika universiteti sifatida tayanch oliygoh etib belgilandi. Pedagog, talaba va o‘quvchilar bilim va ko‘nikmasini baholashning yagona tizimi yaratilib, mustaqil bo‘lgan Pedagogik mahorat va xalqaro baholash markazi tashkil qilindi.

Yig‘ilishda yana bir muhim jihatga eʼtibor qaratildi. Bugungi keskin va tahlikali sharoitda biz ota-onalar va ustoz-murabbiylar, jamoatchilik, mahalla-ko‘y yosh avlod tarbiyasida hushyorlik va ogohlikni yanada oshirishi zarurligi qayd etildi.

Darhaqiqat, bu har bir ota-onaning, o‘qituvchining, ertasini o‘ylaydigan xalqning yuragidagi gap. Barcha ustozlar buni chuqur his etib, taʼlim-tarbiya jarayonida hech bir jihatni ko‘zdan qochirmasligi, ustoz degan ulug‘ nomga munosib bo‘lishi zarur.

Raʼno FOZILOVA,
O‘zbekiston Respublikasi xalq o‘qituvchisi,
partiyaning Chinoz tumani Kengashi aʼzosi