Qonunchilik palatasi deputati Sayyora Jumayevaning Farg‘onaga safari Bag‘doddan boshlandi. Chunki Bag‘dodda hammayoq tinchlik emas. Tuman markazidagi ko‘pqavatli uylarda yashayotganlar bir necha yildirki kanalizatsiya va oqava suv masalasida qiynalmoqda. Deputat masʼullar bilan uchrashib, ushbu masalani hal qilish choralarini o‘rgandi.

Shuningdek, “Milliy tiklanish” fraksiyasi aʼzosi “Chekmirza” mahallasidagi “Ayollar daftari”ga kiritilgan 9 nafar xotin-qizlarni ish bilan taʼminlagan, qovoq yetishtirib, mo‘may daromad ko‘rayotgan, shuningdek, supurgi ishlab chiqarish orqali o‘zini-o‘zi band qilgan fuqarolar xonadonlarida ham bo‘ldi. Maʼlum qilinishicha, bag‘dodliklar yetishtirgan supurgilar xorijiy davlatlarga ham eksport qilinayotgan ekan.