Navbahor tumanidagi ochiq osmon ostidagi muzey – Sarmishsoy darasida bo‘lgan Alisher Qodirov boshchiligidagi ishchi guruh qoyatosh tasvirlar qanday saqlanayotgani va turistlarga yaratilgan sharoitlar bilan tanishdi. Bag‘rida 10 mingdan ortiq petrogliflarni jamlagan tarixiy manzilgoh aslida ajdodlarimiz bu yerda yetti ming yil oldin ham yashaganini tasdiqlaydi.

– Bu suratlar oddiy bitiklar emas. Ularda ajdodlarimiz madaniyati, yashash tarzi, tarixi aks etgan. Shu bois, qoyatosh suratlarini xalqimizning bebaho boyligi sifatida asrashimiz kerak, – dedi Alisher Qodirov qadimiy suratlar ustiga har xil yozuvlar yozib ketilganiga eʼtiroz bildirib.

Demak, odamlar ongida tariximizga bo‘lgan munosabatni o‘zgartirish lozim. Buning uchun hudud muhofazasini kuchaytirish, xodimlar soni va maoshini oshirish, turistlar uchun pullik xizmatlarni ko‘paytirish taklifi berildi.