Yangiliklar


94

Turizmni umummilliy harakatga aylantiramiz!

Mamlakatimizda turizmga iqtisodiyotni rivojlanish jarayonini yanada tezlashtiruvchi omil sifatida qaralayotgani bejiz emas. Chunki bu sohaning taraqqiy etishi bugun davlatimiz uchun eng ustuvor bo‘lgan masala – qo‘shimcha ish o‘rinlari yaratilishida muhim ahamiyatga ega bo‘ladi. Shu bilan birga boshqa tarmoqlarning rivojlanishiga ham turtki beradi.

Turizm rivojlanishining yana bir muhim jihati bu milliy, madaniy va maʼnaviy qadriyatlarimizning dunyoga keng targ‘ib qilinishidir.

O‘zbekiston Prezident Shavkat Mirziyoyev raisligida 19-sentabr kuni mamlakatimizning ichki va tashqi turizm salohiyatini yanada oshirish chora-tadbirlari yuzasidan o‘tkazilgan videoselektor yig‘ilishida ushbu sohani rivojlantirish bo‘yicha belgilab olingan vazifalar ijrosi, amalga oshirilgan ishlar sarhisob qilindi. Ustuvor vazifalar belgilandi.

Yig‘ilishda qayd etilganidek, turizm pandemiyadan keyin qayta tiklanish davrini boshdan kechirmoqda. Joriy yil sentabrigacha bo‘lgan davrda yurtimizga kelgan xorijiy turistlar soni 2021 yilga nisbatan 3 baravarga ko‘paygan va 3,1 mln nafarni tashkil etgan. Yil boshidan turizm eksporti hajmi 926 million dollar bo‘lib, bu ko‘rsatgich qariyb 2019-yil davomidagi hajmga teng bo‘lganligini aytib o‘tish zarur.

Taʼkidlash lozim, yurtimizga tashrif buyurayotgan turistlarning asosiy qismi madaniyatimiz, madaniy merosimiz jamlangan qadimiy shaharlarimizga kelishmoqda.

Videoselektorda ko‘tarilgan masalalar partiyamizning 2020-2024 yillarga mo‘ljallangan Saylovoldi dasturidan ham alohida o‘rin olgan. Partiyamiz o‘z dasturida Madaniy merosni saqlab, turizmni rivojlantirishni umummilliy harakatga aylantirishni o‘zining asosiy maqsadi deb biladi.

O'tgan davr mobaynida “Milliy tiklanish” partiyasi va fraksiyasi tomonidan ushbu yo‘nalishlarda quyidagi ishlar amalga oshirilgan. Xususan, “O‘zbekistonning turizm salohiyatini oshirish borasida amalga oshirilayotgan chora-tadbirlar, shu jumladan, ekoturizmni rivojlantirish borasida olib borilayotgan ishlar to‘g‘risida” Oliy Majlis Qonunchilik palatasining “Parlament so‘rovi” yuborildi. Xalq deputatlari mahalliy Kengashlardagi deputatlik guruhlarimiz tomonidan turizm sohasiga aloqador muammo va masalalarni hal etishga qaratilgan 100 dan ortiq “Deputat so‘rov”lari yuborilgan.

Shu bilan birga turizmni iqtisodiyotning strategik sektori va Vatanimiz imijini oshiruvchi omil sifatida jadal rivojlantirish sohasida ham qator ishlar amalga oshirilmoqda. Jumladan, turizm sohasiga oid qonun va qonunosti hujjatlar ijro holati yuzasidan deputatlik nazoratini amalga oshirish maqsadida deputatlik guruhlari tomonidan 36 marta o‘rganishlar olib borildi. Hududda turizm sohasida amalga oshirilayotgan ishlar yuzasidan 15 nafardan ortiq mansabdor shaxslarning axborot va hisobot eshituvi amalga oshirildi. Ichki turizm va ziyorat turizmini rivojlantirishga ko‘maklashish maqsadida 30 ga yaqin tuman va shaharlarda targ‘ibot aksiyalari o‘tkazildi. Turizm obyektlari atrofidagi yer maydonlari, suv va yo‘l infratuzilmalari holati bo‘yicha 15 dan ortiq o‘rganishlar olib borildi.

Partiyaning “Turizmni targ‘ib etish va rivojlantirish oyligi” doirasida mahalliy Kengashlardagi deputatlik guruhlari tomonidan O‘zbekiston Respublikasining “Turizm haqida”gi Qonunining ijrosi yuzasidan Kengash sessiyalarida viloyat hokimning turizm, madaniyat, madaniy meros va ommaviy axborot kommunikatsiyalari masalalari bo‘yicha o‘rinbosari – viloyat Turizm va madaniy meros boshqarmalari boshliqlarining turizm xizmatlarini rivojlantirish bo‘yicha viloyatlarda amalga oshirilayotgan ishlar to‘g‘risida hisobotlari eshitildi.

Turizm sohasiga oid qonun va qonunosti hujjatlar ijro holati yuzasidan deputatlik nazoratini amalga oshirishga qaratilgan yuzga yaqin o‘rganishlar amalga oshirildi. Shuningdek, turistik faoliyat manzillarida ko‘rsatilayotgan servis xizmatlari o‘rganilib, kengash sessiyalarida muhokama qilindi va tegishli qarorlar qabul qilinishiga erishildi.

Taʼkidlash lozim, partiyamiz mamlakatimizning turistik salohiyatini oshirish, madaniy merosimizni asrab-avaylash va undan foydalanish borasidagi faoliyatini yanada kuchaytirishni o‘zining bosh maqsad-vazifalaridan deb hisoblaydi. Bu yo'lda nafaqat partiyadan saylangan deputatlarimiz, balki partiya a'zolarimiz ham faol bo'lmog'i lozim. 

 

Asqar SULTONOV,

partiya Markaziy kengashi sektor mudiri