Yangiliklar


72

Oʼzbekiston – yangi davr insonparvar siyosatining tashabbuskori

Shanxay hamkorlik tashkiloti — eng yosh tuzilmalardan biri boʼlib, oʼtgan davrda tuzilma maslahat mexanizmi formatidan, bugungi kunga kelib keng qamrovli davlatlararo birlashmagacha boʼlgan darajaga yuksaldi, desak mubolagʼa emas. 

Tashkilot 1996-1997 yillarda “Shanxay beshligi” nomi bilan tashkil etilgan boʼlib, 2001 yilda Oʼzbekiston mazkur tashkilotga aʼzo boʼlib kirishi bilan “Shanxay hamkorlik tashkiloti” nomini olgan.

Hozirgi kunda tashkilot 8 ta doimiy aʼzo davlatni, 4 ta kuzatuvchi va muloqot boʼyicha 6 ta sherik davlatni oʼz atrofida birlashtirgan. Oʼzbekiston Respublikasi ham doimo ShHTning eng faol va tashabbuskor aʼzosi boʼlib kelgan.

Samarqand shahrida boʼlib oʼtgan Shanxay hamkorlik tashkilotining navbatdagi sammiti eng yirik va nufuzli siyosiy tadbirga aylangani hamda anjuman ShHTning asosiy maqsadlariga toʼla mos ravishda oʼtgani bois dunyo hamjamiyati tomonidan alohida eʼtirof etilmoqda.

Sammitda tashkilot tarixida ilk bor 14 ta davlat yetakchisi, 10 ta xalqaro tashkilot rahbari ishtirok etishdi. Doʼstona muhitda oʼtgan yuzma-yuz muloqotlar anjumanning nufuzini yanada oshirdi. Аyniqsa, 40 dan ortiq imzolangan hujjatlarning aksariyati Oʼzbekiston tomoni tashabbusi bilan tuzilgani eʼtiborga molik.

Sababi sammit doirasida qabul qilingan qarorlar tuzilmani kelgusi oʼnlab yillar davomida rivojlantirishda muhim, chinakam yangi strategik yoʼnalishlarni belgilab berdi. Shuningdek, sammit doirasida ikki va koʼp tomonlama shakllarda muzokaralar ham oʼtkazildi. Ushbu uchrashuvlar davomida ishtirokchilar bir qator global va mintaqaviy muammolarni muhokama qilish imkoniga ega boʼldi. 

Shu nuqtai nazardan aytganda, Samarqand sammiti geosiyosiy raqobat, madaniy va qadriyatlar nizolari, milliy xudbinlik va mafkuraviy tarafkashlikdan holi yangi xalqaro muloqot boʼldi, deyishga barcha asoslar yetarli. 

 

Umidjon JАBBOROV,

Oliy Majlis Qonunchilik

palatasidagi "Milliy tiklanish" partiyasi fraksiyasi a'zosi