1995 yil, 3 iyun.

Shubhasiz, ushbu sana mustaqil O‘zbekistonning ijtimoiy-siyosiy hayotidagi muhim voqealardan biri sifatida tarix sahiflaridan joy olgan. Aynan shu kuni milliy mustaqillik g‘oyalarini murosasiz himoya qilish, milliy ruh va dunyoqarashga ega bo‘lgan avlodni vatanparvarlik g‘oyalari bilan tarbiyalash, eng asosiysi, milliy birlikni o‘z maqsadi deb bilgan fuqarolarning qarash va manfaatlarini birlashtirgan partiya - “Milliy tiklanish” siyosiy sahnaga kirib kelgandi. O‘sha paytdayoq yangi partiyaning nomi va g‘oyalari milliy mustaqillik g‘oyalari bilan chambarchas bog‘liq ekani, “Milliy tiklanish” milliy an’analar va qadriyatlarimizni asragan holda zamonaviylik kasb etishi, yangi avlodni - komil insonni tarbiyalashdek ezgu maqsadlarni oldiga qo‘yayotgani ta'kidlangan edi.         

Tan olaylik, garchi 1991 yili istiqlolga erishgan bo‘lsakda, dastlabki yillardagi real holat «Milliy tiklanish» g‘oyalarini nafaqat ko‘tarish, ular haqida gapirishning o‘zi qahramonlik ekanini ko‘rsatar, chunki endigina to‘rt yoshga to‘lgan O‘zbekistonga nisbatan tashqi tahdidlar kuchayib, guruhbozlik va radikalizm avj olgan paytlar edi.

Eng yomoni o‘zlikni anglash, ming yillik qadriyatlarni tiklash, ajdodlarimiz merosini saqlash kabi vazifalar kun tartibiga bosh masala sifatida chiqqan edi. Bular o‘sha davr uchun hayot-mamot masalasi bo‘lib, «Milliy tiklanish» ana shunday nozik bir davrda siyosiy maydonga chiqib, o‘z elektorati manfaatlarini himoya qila boshladi.

Partiyaning 30 yillik tarixi haqida gap ketganida, shubhasiz, ana shu voqealar esga tushadi. Bugunga kelibgina Yangi O‘zbekiston islohotlari siyosiy partiyalar uchun katta yo‘l ochdi. Eng asosiysi, inson huquq va erkinliklari, qonun ustuvorligi, so‘z va e’tiqod erkinligi, xususiy mulk daxlsizligi kabi masalalarda fundamental o‘zgarishlarning tamal toshi qo‘yildi. Kecha va bugunni qiyoslar ekanmiz, O‘zbekistonning genetik rivojlanishida bunyodkorlik ustuvor nuqtadan joy olganiga ishonch hosil qilamiz. Buyuk Temur davri yoki Sizu, biz yashayotgan bugungi kunmi, shubhasiz, tizimli islohotlar, xalq manfaati yo‘lidagi urinishlar davri sifatida tarixga kirmoqda. Garchi Yangi O‘zbekiston ijtimoiy, iqtisodiy va hatto siyosiy muammolarga boy bo‘lgan butun boshli og‘riqli bir davrni meros sifatida qabul qilib olgan bo‘lsa- da, qisqa bir davrda odamlar roziligi birlamchi masalaga aylandi. Millionlab uysizlar, qarovchisiz qolganlar, ayniqsa, ijtimoiy himoyaga muhtoj qatlamga davlat tayanch bo‘ldi va bu jarayon hanuz davom etmoqda.

O‘z faoliyatining birinchi kunlaridanoq «ziyolilar partiyasi» deya nom olgan «Milliy tiklanish» uchun ham Yangi O‘zbekiston islohotlari chin ma’noda imkoniyatlar davriga aylandi.

XXI asrga kelib, globallashayotgan dunyoda o‘zaro ishonch kamayib, qarama-qarshiliklar kuchayayotir. O‘zaro nizolar to‘qnashuvlarga aylanib, shafqatsiz raqobatni yuzaga keltirmoqdaki, bu o‘z- o‘zidan tinchlik va totuvlikka chaqiradigan ajdodlar o‘giti, insonparvar g‘oyalarga to‘yingan milliy qadriyatlarning ahamiyatini oshiryapti.

Xalqaro hamjamiyat ham ushbu murakkab va o‘zaro bog‘liqlikdagi muammolarni faqatgina inson qadri, huquq va erkinliklarini samarali ta’minlash hamda ushbu maqsadda dunyo davlatlari, parlamentlari, biznes hamjamiyati, fuqarolik jamiyati institutlarining o‘zaro samarali hamkorligiga tayangan holdagina hal etish mumkinligini e’tirof etmoqdalar. Bunday talablar esa, eng avvalo, xavfsizligimizni asrash, ayniqsa, milliy qadriyatlarimizni qattiq himoya qilishni taqozo etadi.

Shundan kelib chiqib, partiyamiz 2023-yilda konstitutsiyaviy islohotlar tashabbuskorlaridan biri bo‘ldi va ko‘p o‘tmay xalq xohishi bilan haqiqiy ma’nodagi Xalq Konstitutsiyasi qabul qilindi.

Unda esa dasturiy maqsad va vazifalarimizgacha aks etishi uchun bor imkoniyatlardan foydalandik.

Va, bunga ma’lum bir ma’noda erishdik ham. Pirovardida milliy va umuminsoniy qadriyatlarga sodiqligimiz, jahon sivilizatsiya- siga beqiyos hissa qo‘shgan buyuk ajdodlarimizning ilmiy, madaniy va ma’naviy merosiga tayanish, davlat majburiyatlarida nafaqat madaniy yodgorliklar, balki tarixiy, ma’naviy, madaniy, ilmiy merosimizni qonun bilan muhofaza qilinishigacha erishdik.

Bosh Qomusimizda tarbiya va ta’lim o‘chog‘i bo‘lgan oilani barpo etishda O‘zbekiston xalqining an’anaviy qadriyatlariga, nikoh tuzuvchilarning roziligi va teng huquqliligiga asoslanishi ham mustahkamlab qo‘yildi. Yosh avlodni vatanparvarlik ruhida tarbiyalashga hissa qo‘shish maqsadida esa davlat va jamiyat yoshlarda milliy va umuminsoniy qadriyatlarga sodiqlik, o‘z mamlakati hamda xalqining boy madaniy ma’naviy merosidan faxrlanish, Vatanga mehr- muhabbat tuyg‘ularini shakllantirish to‘g‘risida g‘amxo‘rlik qilishi, davlat yoshlarning ma’naviy, intellektual, ijodiy, jismoniy va axloqiy jihatdan shakllanishi hamda rivojlanishi uchun shart-sharoitlar yaratishiga oid normalargacha o‘z ifodasini topdi.

«Milliy tiklanish» bunday tashabbuslarni endi ilgari surayotgani yo‘q. O‘tgan 30 yil davomida partiyaga taniqli olim, akademik Aziz Qayumov, O‘zbekiston Qahramoni, adabiyotshunos Ibrohim G‘ofurov, taniqli huquqshunos, professor Axtam Tursunov, filologiya fanlari doktori, professor Xurshid Do‘stmuhammad va sotsiologiya fanlari doktori Sarvar Otamurodov kabi insonlar rahbarlik qilganining o‘ziyoq bunday tashabbuslar ildizi partiyaning dastlabki yillariga to‘g‘ri kelishini ko‘rsatadi.

O‘shandayoq partiya ilgari surgan g‘oya va maqsadlar atrofida ming- minglab ziyolilar birlashgan edi. Bugun ham ana shu jarayon izchil davom etmoqda. 2025-yil boshiga «Milliy tiklanish»ning 770 mingdan ziyod a’zosi bo‘lib, Yangi O‘zbekiston islohotlari davrida partiya g‘oyalariga bo‘lgan qiziqish keskin kuchayganini aytish joiz. 2024-yilgi saylovlar yakuni bo‘yicha esa mahalliy kengashlarga 1100 nafarga yaqin vakilimiz saylangani ham g‘oya va tashabbuslarimizni qo‘llovchilar doirasi kengayayotganini ko‘rsatadi. Buning asosiy sabablaridan biri saylovoldi dasturimizda berilgan va’dalarning bajarilgani bilan bog‘liq. Ma’lumki, partiyamiz 2020-2024 yillarga mo‘ljallangan Saylovoldi dasturida 300 ta banddan iborat keng ko‘lamli vazifalarni bajarishni o‘z zimmasiga olgan edi. Ko‘p o‘tmay ularning 294 tasi, ya’ni 98 foizining ijrosi ta’minlandi. O‘tgan yillar davomida partiya siyosati ham qat’iylashdi, islohotlarga nisbatan qarashlarimiz, ertangi kunga bo‘lgan munosabatlarimiz o‘zgardi, saylovchi talabidan kelib chiqib, deputatlar zimmasidagi vazifalar kuchaydi, parlamentda ham, mahalliy kengashlarda ham deputat tom ma’noda xalq vakili bo‘lishi shart, degan haqqoniy talab faoliyatimiz asosiga aylanmoqda.

Zero, bugun partiya fraksiyasining asosiy minbari bo‘lgan parlament so‘z va erkin qarashlar asosida har qanday masalaga huquqiy yechim beradigan milliy maydonga aylanyapti. Prezident Shavkat Mirziyoyev ta’biri bilan aytganda, bugun ana shu vakillik organining a'zosi bo'lgan «Deputat - bu xalq xizmatchisi, barchaga o‘rnak bo‘ladigan, siyosiy bilimi va ongi yuksak, o‘z Vatanini chin dildan sevadigan insonga, kuchli parlament va xalq vakillik organlari esa Yangi O‘zbekistonning tayanchi»ga aylanib boryapti. Bunday yangilanish va o‘zgarishlar jarayonida «Milliy tiklanish»ning ham parlament quyi palatasidagi 29 nafar deputati faol ish olib boryapti.

Bir paytlar hatto o‘z binosiga ega bo‘lmagan partiyamiz Yangi O‘zbekiston parlamentida «Inson o‘zgarsa jamiyat o‘zgaradi» shiori ostida mustahkam pozitsiyasi va qarashlarini himoya qila oladigan ikkinchi yirik kuchga aylandi. Partiyaning ilk davrlarida esa «Milliy tiklanish» g‘oyasini siyosiylashtira oladigan darajada tajribasi ham yo‘q edi. Bugun esa har bir partiya a’zosi jamiyat rivojiga to‘siq bo‘layotgan dolzarb muammolardan tortib, xalqaro masalalarni ham dadil ko‘tarib chiqmoqda.

Zero, bugun Yangi O‘zbekiston islohotlari bahslashadigan emas, birlashadigan nuqtaga kelgani, qadriyatlarga tayanibgina, milliy taraqqiyotga erishish mumkinligini har qadamda his etyapmiz. Amaldagi qonunchilikni tahlil qilish, yangi qonunlar qabul qilishda ham «Milliy tiklanish»ning o‘ziga xos o‘rni borligi bejiz e’tirof etilmayapti.

Ayni damlarda asosiy e’tiborimiz tarbiya va ta’lim tizimini takomillashtirib, kuchli avlodning shakllanishiga xizmat qiladigan tizim yaratishga qaratilyapti. Shuningdek, barkamol avlodni tarbiyalash uchun, eng avvalo, ziyoli pedagoglarni, o‘qimishli ota-onalarni tarbiyalash kerak, degan g‘oyani ham kun tartibiga qo‘ya oldik.

Bir so‘z bilan aytganda, bugun «Milliy tiklanish» mamlakat siyosiy makonidagi ikkinchi yirik partiya sifatida «Qadriyatlarga tayangan taraqqiyot» g‘oyasiga tayanib, mavjud muammolarni boricha ko‘rsata oladigan partiyaga aylandi. Ishonamanki, bundan keyin ham ming-minglab a’zolarimiz ezgu g‘oya hamda ulug‘ maqsadlar sari shijoat va qat’iyat bilan harakat qiladilar!

“Milliy tiklanish”gazetasining 2025-yil 4-iyun sonidan olindi