“Milliy tiklanish” demokratik partiyasining 30 yillik faoliyati tariximizning eng qaynoq lahzalarini bugungi kun bilan qiyoslash, ular haqidagi ma’lumotlarni yoshlarga yetkazish hamda ongu shuurlariga singdirishga qaratildi, deyish mumkin.

Partiyamiz dasturida bayon qilingan g‘oya va qarashlar ana shu nuqtai-nazardan ma’rifatparvar ajdodlarimizning o‘z oldiga qo‘ygan ijtimoiy-siyosiy, madaniy-ma’rifiy maqsadlaridan kelib chiqqan, desak xato bo‘lmaydi. Chunki, “Milliy tiklanish” yangi g'oyaga - qadriyatlarni qadrlash g‘oyasiga tayangan siyosiy kuch sifatida maydonga chiqdi. Ijtimoiy fikr sarhadlarida bo‘y ko‘rsatgan ushbu g‘oya ajdodlar ilgari surgan g‘oyalarga tomirlari bilan tutashdi.

“Milliy tiklanish” bugun bejizga kitobxonlik va iqtidorli yoshlar masalasini ko‘tarayotgani yo‘q. Bunday targ‘ibot- tashviqotlar zamirida esa shaxs tarbiyasi yotadi. Odamzot dunyoga bekorga kelmaydi, u nima uchundir yashaydi, maqsad qiladi, unga intiladi. Agar ana shu inson partiya a’zosi bo‘lsa va bundan g‘ururlansa, siyosiy partiya g‘oyalarini hayotining bir bo‘lagi deb bilsa, uning uchun yoshlar bilan gaplashish shuncha oson bo‘ladi. Shu ma’noda ham “Milliy tiklanish” menga Vatanga muhabbat bilan yashashni, atrofdagilarga e’tiborli bo‘lishni, o‘z ustimda ishlashni o‘rgatdi, faollikka undadi, el-yurt uchun yonib yashashga kuch bag‘ishladi, deya olaman.

Ibrohim G‘AFUROV,
San'at arbobi, adabiyotshunos, adib, tarjimon,
O‘zbekiston Qahramoni. Partiyaning 1996-2004 yillardagi raisi
“Milliy tiklanish” gazetasining 2025-yil 4-iyun sonidan olindi