Behbudiy, Munavvar qori kabi ma’rifatparvarlarimiz: “Bu xalq qachon birlashadi?”, deb faryod chekib o‘tdi. Dunyo aeroplan uchirayotgan bir paytda biz varrak uchirayotganimizdan, odamlar osmonga chiqayotgan bir paytda biz “lanka” o‘ynayotganimizdan kuyunib o‘tdi. Millat birlashishi uchun mana shunday jihatlarga ham e’tibor qaratish kerak. To‘xtamaslik, rivojlanish sari intilish kerak. Shu ma’noda ham nahorgi oshlaru, dabdabali to‘ylarni emas, yurtdoshlarimiz qalbiga “boshqacha yashash”ni singdirish “Milliy tiklanish”ning asosiy vazifasi. Siyosiy partiya - bu davr “farzandi”. Biz faoliyat yuritgan davr mutlaqo boshqacha edi. Umumiy qarashlar bir xil bo‘lgani bilan kechagi va bugungi siyosiy partiyalarni o‘zaro taqqoslash qiyin. Masalan, partiyaning o‘sha paytdagi iqtisodiy imkoniyatlari bilan hozirgisini mutlaqo qiyoslab bo‘lmaydi. Qolaversa, jamiyatdagi erkinlik darajasi ham haminqadar...

O‘rganishlarga chiqqanimizda, hududlarda juda ko‘p muammolarga duch kelardik, ammo ularning birini aytsak, birini ayta olmasdik. U paytlarda siyosiy partiyalarning vazifasi biroz boshqacharoq edi. Siyosiy partiyalar asl vazifalarini endi amalga oshira boshladilar.

Bo‘lib o‘tgan qator saylovlar, siyosiy jarayonlar partiyaning har jihatdan toblanishi, tajriba to‘plashi, siyosiy maydonda o‘z pozitsiyasini aniq belgilab olishi uchun zamin yaratdi. Gap berilgan vakolat va imkoniyatdan to‘g‘ri foydalana olishda. Parlament va deputatlik nazorati institutlaridan samarali foydalanish, odamlar og‘irini yengil qilish, muammolarga o‘ziga xos tarzda yechim topish bugungi siyosiy partiyaning dasturulamali bo‘lishi lozim.

Xurshid DO‘STMUHAMMAD
filologiya fanlari doktori, professor.
Partiyaning 2004-2008 yillardagi raisi
“Milliy tiklanish” gazetasining 2025-yil 4-iyun sonidan olindi