“Milliy tiklanish” demokratik partiyasining 30 yilligi, shubhasiz, mamlakatimiz ziyolilarining katta bayrami. Bugun har birimizni quvontiradigan narsa, bu Yangi O‘zbekiston islohotlarining mamlakat siyosiy maydonidagi kuchlar uchun sog‘lom raqobat yaratib berilgani bo‘ldi. Milliy qadriyatlarimiz, tilimiz, osori-atiqalarni asrash va avaylash, adabiyot va san’atimizu, ta’lim tizimidagi islohotlarga o‘zini mas’ul deb bilgan partiyamiz ham ana shunday imkoniyatlardan samarali foydalanyapti.

Bizni quvontiradigan yana bir jihat borki, bu ayni paytda partiyamiz tomonidan ayollar masalasiga birlamchi e’tibor qaratilayotganidir. Hatto ish vaqtida beriladigan imtiyozdan tortib, turli kvotalar taklif etilayotgani “Milliy tiklanish”ni boshqa partiyalardan ajratib turadi, albatta. Bugun OAVlarda “Milliy tiklanish”ning yoshlar uchun turli imtiyoz va preferensiyalar berish, ayniqsa, ta’lim tizimining nihoyatda shaffof bo‘lishini ta’minlash haqidagi fikr- mulohazalariga alohida e’tibor qaratilayotir. Bu shubhasiz, partiyamiz yutug‘i va dasturiy vazifalarimiz tizimli tarzda amalga oshayotganidan dalolatdir.

Imkoniyatdan foydalanib, barcha partiyadoshlarimizni 30 yillik yubiley bilan muborakbod etaman!

Axtam TURSUNOV,
yuridik fanlari doktori, professor,
O‘zbekiston “Milliy tiklanish” demokratik partiyasining 2008-2013 yillardagi raisi
“Milliy tiklanish” gazetasining 2025-yil 4-iyun sonidan olindi