O‘zbekiston sporti tarixida yana bir yorqin sahifa ochildi


4181     13.06.2025

O‘zbekiston milliy terma jamoasi ilk bor futbol bo‘yicha Jahon chempionatiga chiqish huquqini qo‘lga kiritdi. Bu g‘alabadan nafaqat sportchilarimiz, balki butun o‘zbekistonliklarga katta g‘urur bag‘ishladi.

2026-yilda bo‘lib o‘tadigan Jahon chempionatiga yo‘llanmani qo‘lga kiritish yo‘lida O‘zbekiston milliy terma jamoasi katta mehnat, qatʼiyat va professionallik namunasini ko‘rsatdi. Saralash bosqichidagi keskin bellashuvlarda yurtimiz vakillari kuchli raqiblar ustidan yorqin g‘alabaga erishdi va eng kuchli terma jamoalar qatoridan joy oldi.

O‘zbekiston futbolining bu bosqichga yetib kelishi oson bo‘lmadi, albatta. Yillar davomida qayta qurildi, tahlillar qilindi, xatolardan saboq chiqarildi. Iqtidorli yoshlarga keng yo‘l ochildi, imkoniyatlar yaratildi. Natijada iqtidorli futbolchilar avlodi shakllandi va ular xalqaro maydonlarda yurt shaʼnini munosib himoya qila boshladilar. Futbol maktablari, zamonaviy stadionlar, yoshlar akademiyalari, murabbiylar tayyorlash markazlari – bularning bari bugungi yutuqni taʼminladi.

Davlatimiz rahbari va O‘zbekiston futbol assotsiatsiyasi tomonidan sportchilarni rag‘batlantirish, murabbiylar malakasini oshirish va xalqaro tajribalarni keng jalb qilish bo‘yicha olib borilgan saʼy-harakatlar o‘z samarasini berdi.

Milliy jamoamizning Jahon chempionatiga chiqishi katta yutuq bo‘lishi bilan birga masʼuliyat ham yuklaydi. Yaʼni, mamlakat shaʼni, o‘zbekistonliklarning orzu-umidlari jamoamiz yelkasida. Endi terma jamoamizni butun dunyo futbol jamoatchiligi kuzatadi va bu futbolchilarimizdan kuch, matonat hamda yuqori darajadagi o‘yin talab qilinadi.

Bugun O‘zbekiston nafaqat Markaziy Osiyo, balki butun Osiyo qitʼasi sport maydonida o‘z so‘zini aytmoqda. Endi oldinda Jahon chempionati. Milliy jamoamiz bu katta sahnada ham shubhasiz o‘z so‘zini aytishiga ishonamiz. Buning uchun terma jamoamizda imkoniyat ham, salohiyat ham yetarli.  

 

Alisher ARIPOV,
partiya Markaziy kengashi bo‘lim boshlig‘i