Prezident raisligida o‘tgan bu galgi yig‘ilish yana bir marta o‘zgarishlar muqarrarligini ko‘rsatdi. Asosiy e’tibor taraqqiyotga to‘g‘anoq bo‘layotgan omillarga qaratildi. Yangi O‘zbekiston islohotlari davom etyapti. Davlatni qudratli, qanchalar qiyin bo‘lmasin, millatimizni farovon qilish yo‘lidagi strategik maqsadlarga bosqichma-bosqich erishilmoqda.

Ko‘rib, guvoh bo‘lib turibmiz: mintaqadagi munosabatlar muvozanatga keltirilib, global aloqalarni kengaytirishga erishilmoqda. Lekin dunyoda har kuni o‘zgarayotgan realliklar keskinlashib, hatto urushlarga aylanib ketayotgan raqobat va yirik davlatlarning olib borayotgan qo‘sh standartli siyosatlari O‘zbekiston oldiga ham yangidan-yangi chaqiriqlar qo‘ymoqda.

Odamlar yaxshiga tez ko‘nikib, yomonni tez unutadilar. Bugun atrofimizdagi inqirozlar savdo aloqalarimizga zarar berib, daromadimizni kamaytirayotgani, oqibati bozorlar va odamlarning dasturxonida sezilmasligi uchun amalga oshirilayotgan mashaqqatli ishlarni albatta, hamma ham ko‘ravermaydi yoki ko‘rib ko‘rmaslikka oladilar.

Soha uchun mas’ullar, hududlar rivoji uchun, aholi roziligi uchun javobgarlar qayta-qayta ogohlantirilgan yig‘ilishda yoz mavsumi uchun energiya iste’moli rejalanganidan 30 foizgacha ortib ketganiga urg‘u berildi. Xonadonlarda elektromobildan konditsionergacha energiya iste’mol qiluvchi mulk 10 yil avvalgiga nisbatan 5 barobarga ortgan, bu albatta, aholining turmushi farovonlashayotganidan dalolat. Lekin aholi alternativ energiya manbalaridan foydalanishga o‘rgatilmasa, gaz yoqish hisobiga olinayotgan qimmat energiya qulaylikni qisqa vaqtda noqulaylikka aylantirib yuborishi mumkin. Isroil-Eron inqirozi oqibatida aviaqatnovlar masofasi 2-3 soatga uzaydi, xalqaro avtoyo‘llar yopildi, eksport qiyinlashdi, import qimmatlashdi. Bu faqat uch kun ichida ro‘y bergan o‘zgarishlar. Xo‘sh, ushbu voqelik bir oy yoki Rossiya-Ukraina inqirozidek yillab davom etsa, nima bo‘ladi? Nima qilish kerak?

Ichki imkoniyatlardan samarali foydalanish, tadbirkorlarimizni qo‘llab-quvvatlash, resurslarni qadrlash bilan bir qatorda yagona xalq, birlashgan jamiyat sifatida muammolarni yechish yo‘llarini topish va maqsadlarimizga erishilishini ta’minlashimiz kerak.

Bunday davrda ikkita odamga rahbarlik qilish, 100 minglab saylovchining vakilligi mas’uliyatli va og‘ir yuk. Rahbarlik birinchi navbatda mas’uliyatni zimmasiga ola bilishdir. Har qanday rahbardan, avvalambor, bevosita vazifalarini yuqori samara bilan ijro qilish, qoliplardan tashqariga chiqib o‘ylash va noan’anaviy, ayni paytda foydali qarorlar qabul qila olish talab qilinmoqda. Fraksiyamiz a’zolari bilan shu masalani obdon muhokama qildik. Barcha deputatlarimiz o‘z hududlarida mahalliy deputatlar va faollarimiz bilan davlat dasturlari ijrosi, partiya saylovoldi dasturidagi maqsadlarga erishishni ta’minlash uchun tashviqot va nazorat-tahlil ishlarini olib boradigan bo‘lishdi. Loqayd, mas’uliyatsiz, yetarli bilim va qobiliyatga ega bo‘lmaganlar bilan yo‘llarimiz ayriladi. O‘zbekiston taraqqiyotining ushbu bosqichida natija barcha tarmoqlarda boshqaruvning samarali harakati va to‘g‘ri qarorlariga bog‘liq bo‘ladi.

Alisher QODIROV,
“Milliy tiklanish” demokratik partiyasi Markaziy kengashi raisi
“Milliy tiklanish” gazetasining 2025-yil 18-iyun sonidan olindi