Yangiliklar


269   14-10-2022

Saylovchilar ishonchini oqlash masʼuliyati yoki Namangan viloyati hokimi hamda Ichki ishlar vazirligi tomonidan ajratilgan 57 milliard so‘m evaziga bir qishloq ahlining hayoti, turmush tarzi qanday o‘zgargani xususida

«Uyg‘ursoy»da ham «Odamlar ertaga emas, bugun yaxshi yashashi kerak» degan ezgu g‘oya o‘z ifodasini topdi. Yaʼni, endi «Obod qishloq» va «Obod mahalla» dasturlari asosida uyg‘ursoyliklar hayoti ham yaxshilanadigan bo‘ldi.

Mutaxassislarning fik­richa, mamlakatimizda sharoiti og‘ir bo‘lgan 1071 mahallaning 54 tasi Namangan viloyatida joylashgan. Viloyat hududining qariyb 45 foizini tashkil qilgan Pop tumanidagi «Uyg‘ursoy» ana shunday hududlardan biri.

Mahallada 31 ta ikki qavatli uy va 90 dan ziyod hovli bo‘lib, ularda bugun 2084 nafar kishi yashamoqda. XX asrning 50-yillarida qurilgan bu uylar shu kungacha deyarli taʼmirlanmagan, aholi esa hatto uylarining tomidan chakka o‘tishiga ham o‘rganib qolishgandi. 18 kilometr uzoqlikdan tortib kelingan ichimlik suvi quvurlari ham allaqachon chirib bo‘lgan. Mahalliy aholining taʼkidlashicha, bir hududga kecha-kunduzda atigi bir soat suv berilardi, xolos. Hatto oqova suvi ham yo‘q edi...

Elektr taʼminoti, qishda loy, yozda esa chang-to‘zon ko‘tariladigan ichki yo‘llar haqida gapirmasa ham bo‘lardi. Kanalizatsiya tizimi butkul izdan chiqqan, odamlar tibbiy xizmat uchun tuman yoki viloyat markaziga qatnashga majbur, maktab va bolalar bog‘chasidagi shart-sharoitlar, hashamatli ko‘ringan ikki qavatli Madaniyat uyi haqida ham yuqoridagidek fikr bildirish mumkin edi...

«Uyg‘ursoy»liklar qariyb yarim asrdan beri shunday sharoitda yashadilar. Chunki aholining yuzlab murojaatlari qaysidir rahbarlarning stoli ustida sarg‘ayib qolaverardi...

Nihoyat, «Milliy tik­lanish» demokratik partiyasining Oliy Majlis Qonunchilik palatasi deputati Abdumalik Akromov saʼy-harakatlari, viloyat hokimining esa amaliy yordami bilan «Uyg‘ursoy» tuman markazidan qolishmaydigan darajadagi shaharchaga aylandi, deyish mumkin.

– Bu masalani hal qilish oson bo‘lmadi, – deydi deputat. – Butkul izdan chiqqan infratuzilmani yaxshilashga ozmuncha mablag‘ ketmasdi. Shuning uchun ham tuman miqyosida bu masala yechilmasligi maʼlum bo‘ldi. Viloyatda esa sharoiti bundan-da og‘ir mahallalar bor. Ammo saylovchilarimning umidi, ishonchi menga kuch-quvvat berdi. Avvalo, Pop tumani hokimi Aʼzamjon Sultonov bilan hududdagi sharoitlarni o‘rgandik, aholi bilan gaplashdik. Maʼlum bo‘lishicha, mahallada Ichki ishlar vazirligiga qarashli obyektlar – jazoni ijro etish muassasasi, harbiy qism, madaniyat saroyi, hatto suv oqova tizimi ham joylashgan, ikki qavatli uylarda esa harbiylar oilasi bilan yasharkan. Yaʼni, ayrim obyektlar vazirlik tasarrufida ekan. Demak, bu masala vazirlikning ishtirokisiz hal bo‘lmasdi.

Shundan keyin viloyat hokimi, Oliy Majlis Senati aʼzosi Shavkatjon Abdurazzoqov bilan uchrashib, muammolarni aytdik va takliflarimizni o‘rtaga tashladik. Hokim esa xayrli ish uchun mablag‘ ajratishga vaʼda berdi.

Ko‘p o‘tmay, Ichki ishlar vaziri Po‘lat Bobojonovga «Deputatlik so‘rovi» chiqardim. Vazir ham bu masalaga alohida eʼtibor qaratib, Jazoni ijro etish departamenti boshlig‘i R.Tursunov boshchiligidagi guruhni «Uyg‘ursoy»ga jo‘natdi. Shundan keyin yana bir marta viloyat va tuman mutasaddilari bilan shart-sharoitlarni o‘rgandik.

Xayrli ishning qanoti bor deganlaridek, tez orada ishchi guruhi tuzilib, loyihalar ishlab chiqildi, eng asosiysi viloyat hokimi vaʼda qilganidek zarur mablag‘ni ajratib berdi va shaxsan o‘zi Ichki ishlar vazirligi vakillari bilan mahallaga kelib, shu yilning mart oyida belgilangan ishlarni boshlab berdi...

Oradan yetti oy o‘tib, uyg‘ursoyliklar hayotidagi eng quvonchli voqea – tanib bo‘lmas darajada bunyodkorlik ishlari amalga oshirilib, tashlandiq mahalladan kichik bir shaharchaga aylangan «Uyg‘ursoy»ning ochilish marosimi bo‘lib o‘tdi.

Unda Ichki ishlar vazirligi, viloyat va tuman mutasaddilari «Uyg‘ursoy»liklarni qutlashdi. Bayram tadbirini viloyat hokimi Sh.Abdurazzoqov ochib, mamlakatimizda «Inson qadri uchun» ezgu g‘oya hayotiyligini taʼminlash yo‘lida maqtashga arzigulik ishlar olib borilayotganini taʼkidladi.

– «Obod mahalla» va «Obod qishloq» dasturlari doirasida eng chekka qishloqlarimiz qiyofasi ham butkul o‘zgarmoqda. Bugun buning isbotini «Uyg‘ursoy»da ko‘rib turibmiz, – dedi viloyat hokimi.

Ichki ishlar vaziri o‘rinbosari Azizbek Ikramov esa uyg‘ursoyda yoshlarga yaratilgan shart-sharoit kelajakda ularning yurtimiz uchun yetuk kadrlar bo‘lib ulg‘ayishlarida muhim ahamiyatga ega ekani haqida gapirgan bo‘lsa, bevosita bu ishlarga bosh-qosh bo‘lgan Oliy Majlis Qonunchilik palatasi deputati A.Akromov o‘z saylovchilari nomidan bu xayrli ishga hissa qo‘shgan barcha mutasaddilarga, quruvchilarga minnatdorlik bildirib, barcha o‘zgarishlar zamirida inson manfaatlarini ulug‘lash g‘oyasi yotganini taʼkidladi.

– Biz mahallamizda shunday o‘zgarishlar bo‘lishiga hech ishonmagandik. Qisqa vaqt ichida «Uyg‘ursoy»da tanib bo‘lmas darajadagi bunyodkorlik ishlari amalga oshirildi, – deydi mehnat faxriysi Xolmat ota Talabboyev.

«Uyg‘ursoy»liklarning aytishicha, ikki qavatli uylarning barchasi kapital taʼmirlanibdi. Tom qismi qaytadan yopilib, yo‘laklar, tashqi devorlar to‘liq yangilanibdi. 28 kilometrli suv quvuri almashtirilib, odamlarga kun davomida ichimlik suvini yetkazish yo‘lga qo‘yilibdi. Aholiga daraxt ekib, o‘z hovlisida ekin ekish imkoniyati paydo bo‘lganidan esa hamma xursand. Yangi elektr to‘sinlar o‘rnatilib, simlar almashtirilibdi. Ichki yo‘llarga asfalt va beton qoplamalar yotqizilib, ko‘chalarga tungi chiroqlar o‘rnatilibdi. Maishiy xizmat xonalari – kichik savdo do‘koni, ayollar va erkaklar sartaroshxonasi, kafe, kompyuter xizmati yo‘lga qo‘yilibdi. Shuningdek, mini futbol stadioni, bolalar o‘yingohi, “workout” maydonchasi hamda shinam shiyponlar foydalanishga topshirilibdi. Eng asosiysi bu yerda endi yuzlab yangi ish o‘rinlari yaratilyapti.

Xarobaga aylanib qolgan Madaniyat uyi ham kapital taʼmirlanib, haqiqiy maʼnodagi «Maʼnaviyat va maʼrifat markazi»ga aylantirilibdi. U yerda kutubxona, o‘quv kurslari faoliyati yo‘lga qo‘yilibdi. Xullas, «Uyg‘ursoy»ning fotolarda aks etgan avvalgi holatini ko‘rib, bugun bu mahalla Yangi O‘zbekistonga yarashadigan go‘zal va obod mas­kanga aylanganiga guvoh bo‘ldik. Umuman, bu ishlar uchun mahalliy byudjetdan 50 mlrd so‘m, Ichki ishlar vazirligi hisobidan esa 7 mlrd so‘m mablag‘ sarflanibdi.

Viloyat hokimining mahalladagi maktab va bolalar bog‘chasi ham kelgusi yilgi davlat dasturiga kiritilgani haqidagi xabari esa «Uyg‘ursoy»liklarni yana-da quvontirdi.

Fursatdan foydalanib, «Milliy tiklanish» partiyasi fraksiyasi aʼzosi Abdumalik Akromovning «Deputatlik so‘rovi» asosidagi ishlari bilan ham tanishdik.

Xususan, Pop bilan Chust tumanlarini bir-biri bilan bog‘lovchi asosiy yo‘l – xalq tilida “Selxona” deb ataladigan joyda bo‘ldik. Maʼlum bo‘lishicha, 25 yil muqaddam katta miqdorda kelgan sel bu yerdagi ko‘prikni yuvib ketib, jarlik paydo qilgan. O‘shandan buyon uni qayta tik­lash ishlari ortga surib kelingan. Odamlar Chust tumaniga borish uchun hatto 30 kilometrli aylanma yo‘llardan yurishgan.

Deputat saylovchilari murojaatidan so‘ng 2021 yilning fevralida O‘zbekiston avtomobil yo‘llari qo‘mitasiga so‘rov yuboradi. Shundan keyin mutaxassislar kelib holatni o‘rganadi va davlat byudjetidan 2 mlrd so‘m mablag‘ ajratilib, mustahkam kechuv bunyod etiladi.

– Bu kechuv shu yilning may-iyun oylarida bo‘lgan kuchli sel oqimlariga ham bardosh bera oldi, – deydi deputat.

A.Akromovning Xalq taʼlimi vaziriga yo‘llagan «Deputat so‘rovi» bilan esa Pop tumanining “Yuksalish” mahallasida zamonaviy talablar asosida bunyod etilishi kutilayotgan uch qavatli maktab bilan qiziqdik.

Hozir o‘quvchilar tahsil olayotgan maktab aslida 140 o‘ringa mo‘ljallangan bo‘lsa-da, amalda 260 nafar bola o‘qiydi. Eng yomoni, maktab o‘rnida bir paytlar xo‘jalikning kimyoviy dorilar saqlanadigan ombori bo‘lgan. Qo‘shimcha binolar qurilib, ombor maktabga aylantirilgan. Kimyoviy dorilar taʼsiri esa hamon sezilib turibdi. Maktab devorlari borgan sari nurab boryapti...

– 330 o‘ringa mo‘ljallangan maktab qurilishi ancha yillar oldin boshlangan edi. Lekin moliyaviy muammo sabab, bir qavati qurilib, to‘xtab qolgandi. Abdumalikjonning saʼy-harakati bilan maktab qurilishi bu yilgi davlat dasturiga kiritildi. 14 mlrd so‘m mablag‘ ajratilib, qurilish ishlari yana boshlandi. Hozir ichki pardozlash ishlari amalga oshirilmoqda. Yaqin oylarda yangi maktabga ko‘chamiz. O‘quvchilar ham, o‘qituvchilar ham butun qishloq ahli bilan bu kunni sabrsizlik bilan kutyapti, – deydi 48-sonli maktab direktori Sayyora Alimova.

Deputatimiz tahsil olgan maktabda ham bo‘lib, ustozlariyu maktab o‘quvchilari bilan suhbatlashdik. Uning amaliy yordami bilan maktab atrofida turli mevali va manzarali daraxtlar o‘tqazilibdi. Shuningdek, o‘qituvchilar xonasi, faollar zali qayta jihozlanibdi.

Eng muhimi, bugun poplik­lar deputat faoliyatidan mamnun. Saylovda uning nomzodini qo‘llab, adashmaganliklarini qayta-qayta taʼkidlashmoqda.

Deputat Abdumalik Akromov esa «Saylovchilarimning ishonchi meni yangi tashabbuslar sari yetaklaydi», deydi quvonch bilan. Ha, haqiqatan ham xalqqa xizmat qilish, odamlarning og‘irini yengil qilishdan kattaroq baxt yo‘q dunyoda.

 

Ravshan MAHMUDOV,

«Milliy tiklanish» muxbiri

Nargiza Yusupova,

O‘zbekiston Respublikasi Bandlik va mehnat munosabatlari vazirligi huzuridagi Tashqi mehnat migratsiyasi agentligi yetakchi mutaxassisi

"Milliy tiklanish"gazetasining 2022-yil 12-oktabr sonidan olindi