9 oylik faoliyat natijalari tanqidiy tahlil qilindi

Bugun “Milliy tiklanish” demokratik partiyasi Markaziy kengashda 9 oylik ishlar atroflicha tahlil etilib, yo‘l qo‘yilgan xato va kamchiliklar hamda maqtagulik natijalar bo‘yicha Zoom dasturi orqali muhokama qilindi.

Majlisni partiya Markaziy Kengashi raisi Alisher Qodirov olib bordi. Muhokamada qayd etilganidek, o‘tgan davrda ijobiy natijalarga ham erishilgan. Aholi muammolarini o‘z vaqtida hal etishda mahalliy Kengashlardagi faol deputatlarning hissasi tobora ortib bormoqda. Lekin, baʼzi bir hududlarda 2020-2024-yillarga mo‘ljallangan Saylovoldi dasturida belgilangan maqsad va vazifalar hamda “Insonni o‘zgartirish orqali jamiyatni o‘zgartirish” yo‘lidagi tashabbuslar ijrosiga bugungi kun talabi darajasida eʼtibor qaratilmayapti. Xususan, ayrim tuman va shahar kengashlardagi vakillarimiz hamda mahalliy Kengashlardagi deputatlar bugungi  islohotlarga hamohang ravishda ish olib bormayotirlar.

Shu bilan birga yig‘ilishda saylovchilarning huquq va qonuniy manfaatlarini taʼminlash masalasiga jiddiy eʼtibor qaratilib, joylardagi nazorat-tahlil tadbirlari, saylov okruglaridagi o‘rganish hamda aholi murojaatlarida ko‘rsatilgan muammolar yuzasidan mahalliy Kengash sessiyalariga asoslangan masalalarni kiritish lozimligi taʼkidlandi. Partiyaviy loyihalarni yana-da takomillashtirish bo‘yicha ham qator tavsiyalar berildi.

Kun tartibiga kiritilgan masalalar bo‘yicha hududiy Kengashlar vakillari ham so‘zga chiqib, o‘z takliflarini bildirdilar. 

Tadbir yakunida kadrlar salohiyatini oshirib borish, jamiyatda kechayotgan har qanday voqea va hodisalarga o‘z vaqtida munosabat bildirish, saylovchilarga berilgan vaʼdalar ijrosini taʼminlash va monitoringini olib borish kerakligi aytib o‘tildi. Ommaviy axborot vositalari bilan hamkorlikni ham sifat jihatdan yuksaltirish kerakligi taʼkidlandi. Hududlardagi vakillarning takliflariga asosan har chorakda faol ish olib borayotgan va xalqning haqiqiy vakili sifatida “Milliy tiklanish” g‘oyalarini targ‘ib qilib qilayotgan mahalliy Kengash deputatlarini rag‘batlantirib borish choralari bo‘yicha yangi tizim joriy etilishga kelishib olindi.

MTDP Markaziy kengashi

Matbuot xizmati