Ta'lim va tarbiyadagi xatolar jiddiy ko'rib chiqilishi kerak

Eʼtibor bergan bo‘lsangiz so‘nggi paytlarda ustoziga qo‘l ko‘targan o‘quvchi, o‘quvchini kaltaklagan o‘qituvchi kabi videolar ko‘p tarqalmoqda. Ammo bu galgisi juda oshib tushdi.

To‘g‘risi har gal maktabda shunga o‘xshagan holatni eshitsam o‘qituvchilarga ham qiyin bugungi o‘quvchilar juda erka, ota-onalar maktabga aralashaverib shu ahvolga keltirishdi taʼlimni deb ustozlarni ham biroz yonini olardim. Ammo Namangan viloyatidagi maktabda geografiya o‘qituvchisi yo‘l qo‘ygan qaltis xato maktab taʼlimidan tashqari, taʼlim beruvchilar masalasi ham jiddiy ko‘rib chiqilishi kerakligini ko‘rsatdi.

To‘g‘ri o‘quvchilar orasida erka, qaysar, tarbiyasi og‘ir bolalar ham bor. Juda asabingga tegib, boshqarishni imkoni bo‘lmagan bolani sinf rahbar sifatida ota-onasini chaqirtir, maktabdan chetlashtirish bo‘yicha direktor qarorini chiqarish amaliyotini yo‘lga qo‘y. Ota-onasiga chora ko‘rilsin. Axir bugun hamma maktablar qaysidir sektor rahbariga biriktirilgan. Ayovsiz kaltaklash...demak o‘qituvchi o‘zida emas, agressiya holatida. Bu taʼlimning haqiqiy tanazzuli.

Avvaldan aytaman, taʼlimda korrupsiyaga yo‘l qo‘ygan, kasbiga noloyiq bo‘lgan kadrlarni sohada qayta ishlay olmaslik kabi og‘ir jazo bilan jazolash kerak. Taʼlimda xato qilganlarga ko‘ngilchanlik qilib bo‘lmaydi. Ishoning ular kelajakka xiyonat qilgan insonlar bo‘ladi (korrupsioner va agressiya kayfiyatidagilar).

Bu juda jiddiy signal. Oldingilariga o‘qituvchini ishdan bo‘shatish orqali yechim topgandek bo‘ldik. Demak bu yechim emas ekan. Ikkinchi tomon ham albatta javob berishi kerak qoidani, tartibni buzgani uchun, o‘qituvchining bu galgi harakati esa taʼlim vaziriga berilgan qattiq signal. Kadrlar masalasini jiddiy ko‘rib chiqish, o‘quvchilarning maktabda o‘zlarini tutishlari, qoidalarga amal qilishlari bo‘yicha qatʼiy choralarni belgilash vaqti keldi.

Umida Rahmonova

Oliy Majlis Qonunchilik palatasidagi "Milliy tiklanish" partiyasi fraksiyasi aʼzosi,

Yoshlar komissiyasi aʼzosi