Partiya Markaziy kengashi raisi Alisher Qodirov boshchiligidagi ishchi guruhning Farg‘onadagi o‘rganishlari Quvasoy shahri Xalq qabulxonasidan boshlandi. Maʼlumki, Prezident ishtirokida 16-iyun kuni o‘tgan videoselektorda Xalq qabulxonalari ishi jiddiy tanqid qilinib, bir qator vazifalar belgilangan edi. Ishchi guruh ushbu vazifalardan kelib chiqib, murojaatlarni o‘rgandi, aholini qiynayotgan muammolarni tahlil qildi.

So‘ngra deputatlar eksportbop quyosh panellari va yoritish uskunalari ishlab chiqaruvchi "Blue Carbon” korxonasida bo‘ldi. Maʼlum qilinishicha, 10 mln dollarlik xorijiy investitsiya hisobiga barpo etilgan korxonada 150 ta doimiy ish o‘rni yaratilgan. Viloyatdagi bog‘chalarni issiq ovqat bilan taʼminlovchi "Garden catering" korxonasi ham deputatlar eʼtiborida bo‘lgani bejiz emas. Korxona kelajakda Toshkent shahrining Sirg‘ali va Bektemir tumanlaridagi bog‘chalarni ham oziq-ovqat bilan taʼminlamoqchi.