Hech qaysi madaniyat boshqa xalq madaniyati uchun asos bo‘la olmaydi!

So‘nggi paytlarda maʼnaviyatimizga zid bo‘lgan turli g‘arazli kuchlar “ommaviy madaniyat” niqobi ostida yoshlarimiz ongiga taʼsir o‘tkazishga harakat qilishmoqda.Toshkent shahrida energetik ichimligi hisoblangan “Mountain dew” reklamasi hammasidan ham oshib tushdi.Energetika ichimligi bahonasida LGBT vakillari qiliqlarini namoyish etish, jamiyatni siyqalashtirishga qaratilgan harakatdan boshqa narsa emas. Tushunamiz, hech qaysi madaniyat boshqa madaniyatning aralashuvisiz rivojlanmaydi,  lekin hech qaysi madaniyat boshqa xalq madaniyati uchun asos bo‘la olmaydi. Har bir xalqning madaniyati uning o‘z milliy qadriyatlaridan, urf-odatlaridan kelib chiqib shaklllanadi.

Reklama mahsulotining bizning yurtimizda namoyish etilishi yuzasidan mutasaddi tashkilotlarning tushuntirishlarini talab qilishga xalqimizning haqqi bor. Masalaning ikkinchi tomoni, Energetik ichimliklar reklamasi qonun hujjatlarida taqiqlangan, lekin uni buzganlik uchun kim javob beradi. Javobgarlik choralarini kuchaytirish esa haqida ham o‘ylashimiz talab etiladi. Aynan shu holat bo‘yicha “yashirin reklama” yo‘qligini kim kafolatlaydi. Bu bo‘yicha javobgarlik ham ko‘zda tutilishi to‘g‘ri bo‘ladi.

Bizning milliy madaniyatimizda hayo, andisha, ibo kabi axloqiy fazilatlarga qatʼiy ravishda amal qilinib kelinadi. Ming yillik odob-axloq qonimizga singgan ezgu qadriyatlarni boshqa anʼanalar bilan almashtirish ongli insonga xos bo‘lmagan odatdir. Aslida xalqimizdan boshqalar o‘rnak olsa arzigulikdir. Xalqimizda “Kasalni davolashdan ko‘ra, uni oldini olgan maʼqul” degan naql bor.

Muxlisa Ergasheva,

“Milliy tiklanish” demokratik partiyasi

Markaziy Kengashi bo‘lim boshlig‘i