Xitoy Xalq Respublikasi elchixonasi attashesi vakillari bilan uchrashuv o‘tkazildi

“Milliy tiklanish” demokratik partiyasi Markaziy kengashida Xitoy Xalq Respublikasi elchixonasi attashesi vakillari janob Chen Yuyszyun va xonim Syu Sinkay bilan uchrashuv bo‘lib o‘tdi.

Uchrashuv avvalida partiya Markaziy kengashi bo‘lim boshlig‘i Bekzod To‘rayev mehmonlarga partiya faoliyati va uning ustuvor yo‘nalishlari to‘g‘risida qisqacha ma’lumot berdi va Xitoy Kommunistik partiyasining XX Syezdi muvaffaqiyatli o‘tgani bilan tabrikladi.

Uchrashuv davomida Xitoy Xalq Respublikasi elchixonasi attashesi vakillari davlatlar o‘rtasidagi hamkorlik va parlamentlararo aloqalarni mustahkamlash hamda partiyalararo aloqalarni rivojlantirish yuzasidan o‘zlarining takliflarini bildirishdi. Shu bilan birga Xitoy Kommunistik partiyasi Xalqaro bo‘limi bugun butun dunyo bo‘ylab partiyalar va siyosiy tashkilotlar bilan hamkorlik qilayotganini, yosh avlod manfaatlarini xalqaro miqyosda targ‘ib qilishda O‘zbekiston kabi korrupsiyaga qarshi kurash mavzusida seminar o‘tkazish tashabbusi bilan chiqishdi.

Muloqot davomida keyingi yillarda O‘zbekiston siyosiy partiyalarining Xitoy Kommunistik partiyasi Markaziy qo‘mitasi bilan konstruktiv o‘zaro hamkorligi sezilarli darajada faollashgani ta’kidlandi.

“Milliy tiklanish” demokratik partiyasi vakillari yuqorida bildirilgan takliflar bo‘yicha tegishli tartibda chor-tadbirlar belgilanishini, bugungi uchrashuvdan so‘ng Xitoy Kommunistik partiyasi bilan o‘zaro hamkorlik aloqalari yanada rivojlanishiga umid bildirishdi.

Savol va javoblar, munosabat va takliflar asosida bo‘lgan uchrashuv do‘stona va samimiy ruhda o‘tdi. Tadbir yakunida partiya faoliyatiga oid targ‘ibot materiallari va esdalik sovg‘alari almashildi.

 MTDP Markaziy kengashi Matbuot xizmati