Maktablarda o‘zbek imo-ishora tili va Brayl alifbosi o‘rgatiladi

Joriy yilning 21-oktyabr kuni O‘zbekiston Respublikasi Prezidentining “O‘zbek imo-ishora tili va Brayl alifbosini rivojlantirish bo‘yicha qo‘shimcha chora-tadbirlari to‘g‘risida”gi qarori qabul qilindi.

Qarorga ko‘ra o‘zbek imo-ishora tilini yana-da rivojlantirish va uning huquqiy maqomini oshirish bo‘yicha kompleks chora-tadbirlarni amalga oshirish, undan muloqot vositasi sifatida foydalanishni rag‘batlantirib borish hamda ko‘rish, eshitish va nutqida nuqsoni bo‘lgan shaxslarning ijtimoiy-mehnat ko‘nikmalarini hosil qilishiga va jamiyatga uyg‘unlashuviga ko‘maklashish belgilanmoqda.

Shuningdek, qaror bilan 2023-yil 1-yanvardan boshlab, talablardan kelib chiqqan holda, umumiy o‘rta taʼlim muassasalari hamda “Ishga marhamat” monomarkazlarida o‘zbek imo-ishora tili va Brayl alifbosini o‘rgatish bo‘yicha maxsus o‘quv kurslari tashkil etiladi.

Qarordagi imkoniyati cheklanganlar uchun eng muhim jihatlaridan yana biri shuki, davlat telekanallarida haftalik efir vaqtining kamida besh foiz hajmidagi ko‘rsatuvlar surdotarjima, yashirin subtitrlar yoki “yuguruvchi satrlar” bilan namoyish etiladi. Shu bilan birga davlat oliy taʼlim muassasalarining magistratura mutaxassisliklariga hamda oliy taʼlimdan keyingi taʼlim ixtisosliklariga o‘qishga qabul qilishda ko‘rish, eshitish va nutqida nuqsoni bo‘lgan shaxslar tomonidan xorijiy tilni bilish bo‘yicha milliy yoki unga tenglashtirilgan xalqaro sertifikatni taqdim etish talab etilmaydi hamda oliy taʼlim muassasalariga kirish imtihonlarida qatnashayotgan eshitish va nutqida nuqsoni bo‘lgan abituriyentlar majburiy tartibda surdotarjimon xizmatlari bilan taʼminlanadi.

Xulosa qilib aytganda mamlakatimizda inson qadrini ulug‘lash, har bir fuqaro manfaatini himoya qilishda muhim hujjatlar qabul qilinib, tegishli chora-tadbirlar amalga oshirilmoqda. Yuqorida keltirilgan qaror esa imkoniyati cheklanganlarning manfaatiga mos ravishda xizmat qiladi.  

Bekzod To‘rayev,

Partiya Markaziy kengashi bo‘lim boshlig‘i