Mamlakatimiz Prezidenti Shavkat Mirziyoyev tomonidan 30-iyun – Yoshlar kuni munosabati bilan o‘tkazilgan bayram tadbirida O‘zbekiston yoshlariga bejizga “Yangi tarix yaratadigan oltin avlod” degan taʼrif berilmadi. Taʼkidlanganidek, Birinchi va Ikkinchi Renessansni buyuk alloma va mutafakkirlarimiz yaratgan bo‘lsa, Uchinchisini yaratish navbati Yangi O‘zbekiston yoshlari zimmasiga tushyapti. Chunki bugungi kun yoshlari yurtimiz bayrog‘ini yana-da baland ko‘tarishga qodir va shunday bo‘lyapti ham. Bunga o‘nlab, yuzlab misollarni keltirishimiz mumkin.

Ayniqsa, yoshlarimizning ilm-fan, taʼlim, IT, madaniyat, sanʼat va sportdagi yutuqlari tahsinga sazovor. Masalan, o‘tgan yili yoshlar “Top-500”talik oliygohlarga kirish bo‘yicha Markaziy Osiyoda 1-o‘rinni egallagan bo‘lsa, bilimli yoshlarimiz ilk bor top-5 talikdagi oliygohlarga kirib, tarixiy natija qayd etdi. Bugun 30 nafar yoshlarimiz dunyoning “Top-10”talik oliygohida tahsil olmoqda.

Taʼkidlash lozim, bugunngi kunda IT kasblariga qiziqish O‘zbekiston yoshlari orasida ham “trend”ga aylandi. Chunki, bu soha ham zamonaviyligi, ham daromadliligi bilan alohida ajralib turadi. Birgina “Bir million dasturchi” loyihasi doirasida 325 ming yoshlar o‘qitildi. Natija: so‘nggi besh yilda O‘zbekistonning IT xizmatlari eksporti 170 million dollardan 1 milliard dollarga o‘sdi. Mamlakatimiz sunʼiy intellektga tayyorlik bo‘yicha xalqaro indeksda 17 pog‘onaga yuqorilab, Markaziy Osiyoda birinchi o‘rinni egalladi. Shuningdek, O‘zbekiston telekommunikatsiya sohasi o‘sish surʼati bo‘yicha MDH davlatlari orasida peshqadam bo‘ldi.

Shu o‘rinda so‘nggi yetti yilda boshqaruv kadrlari tarkibi ancha yosharib, 40 yoshgacha bo‘lgan rahbarlar ulushi 37 foizdan 65 foizga oshganini alohida qayd etish lozim. O‘tgan oyda istiqbolli kadrlar tayyorlash va ularni davlat boshqaruviga jalb etish bo‘yicha Prezident Farmoni imzolandi. Endi Davlat boshqaruvi akademiyasida “Kelajak liderlari” dasturi bo‘yicha har yili 100 nafar salohiyatli yoshlar o‘qitiladi.

Yoshlarimizning madaniyat, sanʼat va sportdagi yutuqlari haqida ham uzoq gapirish mumkin. Yoshlarimiz bu boradagi yaratilgan sharoitdan unumli va maqsadli foydalanib, yuqori cho‘qqilarni zabt etmoqda. Mana isboti: 2024-yilda Parijda o‘tgan Olimpiya va Paralimpiya o‘yinlarida yurtimiz sportchilari muvaffaqiyatli ishtirok etib, umumjamoa hisobida har ikki yo‘nalishda 13 o‘rinni egallagan bo‘lsa, yaqinda xalqimizning 34 yillik orzusi ushaldi: Futbol bo‘yicha milliy terma jamoamiz tarixda ilk bor jahon chempionati yo‘llanmasini qo‘lga kiritdi.

Xalqaro kongress markazida bo‘lib o‘tgan bayram tadbirida Davlatimiz rahbari tomonidan yoshlarimizning barcha yo‘nalishdagi yutuqlarini yangi bosqichga ko‘tarish maqsadida muhim taklif va tashabbuslar ilgari surildi va ular yoshlarimiz tomonidan katta mamnuniyat va ishonch bilan qabul qilindi.

Mamlakatimiz Prezidenti taʼkidlaganlaridek, yoshlikdagi harakat bu – kelajakdagi yutuq degani. Yoshlikda orttirilgan do‘st – bir umrlik hamkor, tayanch va suyanch degani. Hech qachon unutmang, farzandlari bilimli, sog‘lom, mard va jasur, doimo oldinga intilib yashaydigan xalq va davlatning kelajagi albatta yorug‘ bo‘ladi. Zero, yoshlarimizning har bir muvaffaqiyati biz uchun kuch-qudrat, mamlakatimiz kelajagiga tayanch.

Jamshid KARIMOV,

Xalq deputatlari Uchtepa tuman Kengashi deputati