Xodimlar va ish beruvchilar tengligi taʼminlanmoqda

Buxoro viloyati, Qorako‘l tumanidagi ixtisoslashtirilgan maktabda “Milliy tiklanish” partiyasi fraksiyasi aʼzolari Jahongir Shirinov hamda Nazir Sabirovlar saylovchilar bilan uchrashdi. Mavzu: yangi tahrirdagi Mehnat kodeksiga kiritilgan o‘zgarishlar.

Uchrashuvda partiyaning Buxoro viloyati Kengashi raisi Maxsud Muxammedov hamda Oliy Majlis Qonunchilik palatasi deputatlari so‘zga chiqib, Mehnat kodeksi mazmun-mohiyatiga to‘xtaldi.

Taʼkidlanganidek, amaldagi Mehnat kodeksi 1995-yilda qabul qilingan bo‘lib, ayni zamonaviy voqelikka mos kelmaydi. Kodeksda fuqarolarni mehnatga jalb qilishning yangi shakllari nazarda tutilmagan. Boshqa bir qator qonun hujjatlariga zid bo‘lgan normalari mavjud edi. Shu bois, yangi Kodeksga zarurat paydo bo‘ldi.

“Milliy tiklanish” demokratik partiyasining Saylovoldi dasturida ayollarga qulay ish sharoitlarini yaratish masalasi ilgari surilgan edi va yangi Kodeksda aynan moslashuvchan ish vaqti rejimi degan tushuncha kiritildi. Bu muayyan xodimlarga ish kunining boshlanish va tugash muddatini o‘zi tartibga solish imkonini beradi.

Xodimning pensiya yoshiga yetganligi munosabati bilan ish beruvchining tashabbusi bilan mehnat shartnomasini bekor qilish bo‘yicha norma chiqarib tashlangani ham eʼtiborga molik.

Bitta tashkilotda ko‘p yillik ish staji uchun qo‘shimcha taʼtil berish tartibi ham joriy etildi (qo‘shimcha taʼtil xodimning tashkilotdagi to‘liq har 5 yillik ish staji uchun 2 kunga, lekin jami 8 kundan ortiq bo‘lmagan muddatga ko‘paytirilgan). Ish beruvchining ish haqini kechiktirish uchun javobgarligi (kechiktirilgan har bir kun uchun qayta moliyalash stavkasining 10 foizi miqdorida) belgilandi.

Yangi tahrirdagi Kodeks shubhasiz bozor iqtisodiyoti sharoitida xodimlar va ish beruvchilar manfaatlarining tengligini taʼminlaydi. Fuqarolarning mehnatga jalb qilish amaliyotiga zamonaviy qarashlarni joriy etadi.