Sirg‘alida qonunlar ijrosiga nega amal qilinmayapti?

Xabar qilganimizdek, “Milliy tiklanish” demokratik partiyasi qoshida tashkil qilingan “Til posbonlari” jamoatchilik nazorati guruhi Sirg‘ali tumanida bo‘lib, “Davlat tili to‘g‘risida” hamda “Reklama to‘g‘risida”gi qonunlar ijrosi bilan tanishdi.

Avvalo tuman nomi haqida. “Davlat tili to‘g‘risida”gi qonun qabul qilinganiga 33 yildan oshgan bo‘lsada, tuman nomi hamon ikki xil nomda – Sergeli va Sirg‘ali tarzida yozilmoqda. Ajablanarli tomoni, qonun ijrosiga masʼul bo‘lgan idora – tuman hokimligida, ijtimoiy tarmoqlardagi rasmiy sahifalarida Sergeli tarzida ishlatilmoqda. Demak, tuman masʼullari qonun ijrosiga befarq ekan, boshqalar haqida nima deyish mumkin?

Tumanda “Reklama to‘g‘risida”gi qonun ijrosiga ham deyarli amal qilinmayapti. Bozor va savdo do‘konlari, yo‘l bo‘ylaridagi tashqi reklamalar, peshlavhalar bilganicha, xohlagan tarzida yozilyapti, go‘yoki bu bo‘yicha hech qanday tartib-qoida yo‘qdek.

– “Til posbonlari” guruhi tuman hokimligi mutasaddilari hamrohligida  ikkinchi bor Sirg‘alida bo‘lmoqda. Birinchi o‘rganishlardan so‘ng dehqon bozoridagi ayrim reklama va peshlavhalar o‘zgartirilgan. Lekin aksariyat eʼtiroz va takliflar inobatga olinmagan. Demak, qonun ijrosi bilan masʼul idoralar jiddiy shug‘ullanmas ekan, holat eski hammom, eski tosligicha  qolaveradi, – dedi partiya Markaziy kengashi bosh mutaxassisi Nodirbek Murodov.