O‘zbekiston Prezidenti Shavkat Mirziyoyevning Ozarbayjonga amalga oshirgan davlat tashrifi o‘zining mazmun-mohiyati, ahamiyati, ko‘lami va natijadorligi bilan nafaqat ikki mamlakat, balki butun turkiy dunyo va Yevroosiyo mintaqasi uchun ulkan tarixiy ahamiyatga ega voqeylik bo‘ldi.

So‘nggi yillarda ikki qardosh davlat o‘rtasidagi munosabatlar do‘stlik, ishonch va o‘zaro manfaat tamoyillari asosida jadal suratlar bilan rivojlanmoqda. Shu bois, Prezidentimizning Ozarbayjonga tashrifi ayni o‘z vaqtida va nafaqat rasmiy, balki keng ko‘lamli, amaliy natijalarga boy tashabbuslar bilan ajralib turdi.

Shuni alohida taʼkidlash joizki, ikki davlat o‘rtasidagi strategik va ittifoqchilik munosabatlari nafaqat siyosiy-iqtisodiy, balki madaniy-gumanitar sohalarni ham qamrab olgan holda, O‘zbekiston va Ozarbayjon xalqlari o‘rtasida qadimiy do‘stlik aloqalarini mustahkamlashga xizmat qilmoqda.

Bugungi kunda mamlakatlar o‘rtasida 300 ga yaqin qo‘shma korxonalar faoliyat yuritayotgan bo‘lib, savdo hajmi 25 foizga oshib, 4 milliard dollarlik loyihalar portfeli shakllangan va bu raqamlar zamirida o‘zaro ishonch va aniq rejalar mujassam. Ayniqsa, transport, energetika, qishloq xo‘jaligi kabi sohalardagi yirik loyihalar ikki mamlakat hayotida ulkan iqtisodiy o‘zgarishlarga asos bo‘lmoqda.

Zamon bilan hamnafas, ekologik barqarorlikni ko‘zlagan "yashil energetika" sohasidagi tashabbuslar, yuklarning Yevropaga tranziti, Boku shahrida “O‘zbekiston” bog‘iga asos solinishi – bularning barchasi ikki xalq o‘rtasidagi mustahkam do‘stlik ramzidir. Shuningdek, milliy meʼmorchilik va zamonaviy infratuzilma uyg‘unligi bo‘lgan O‘zbekiston elchixonasining yangi binosi ochilishi va bog‘ loyihasi nafaqat madaniy, balki davlatlararo diplomatik aloqalar ramzi sifatida alohida o‘rin tutadi.

So‘nggi yillarda Ozarbayjon bilan O‘zbekiston – nafaqat diplomatik, balki iqtisodiy, ijtimoiy va madaniy yutuqlarga asoslangan yangi davrga qadam qo‘yib, umumiy taraqqiyot yo‘lida namuna bo‘la oladigan yirik mintaqaviy ittifoqchilar sifatida namoyon bo‘lmoqda. Bu o‘zgarishlar davlatlar o‘rtasidagi 30 yillik diplomatik munosabatlar doirasida erishilgan natijalarga asoslangan holda amalga oshirilayotganini alohida taʼkidlashimiz lozim.

Prezidentimizning Ozarbayjonga davlat tashrifi ikki mamlakat o‘rtasidagi munosabatlarda yangi bosqichni boshlab berishi bilan birga, o‘tkazilgan uchrashuv va muzokaralar sohalardagi aloqalarning yanada keng rivojlanishiga asos bo‘lishi bilan muhim ahamiyatga ega.

Ruslan JUMAMURATOV,
Oliy Majlis Qonunchilik palatasi deputati