Mamlakatimizning tinchliksevar tashqi siyosati haqida gap ketganda, qardosh davlat — Ozarbayjon bilan yo‘lga qo‘yilgan strategik va ittifoqchilik munosabatlari alohida tilga olinadi. So‘nggi yillarda ikki davlat o‘rtasidagi munosabatlar mutlaqo yangi bosqichga ko‘tarildi. Do‘stona va qardoshlik munosabatlari nafaqat siyosiy, balki iqtisodiy, madaniy, ta’lim, umuman, barcha yo‘nalishlarda izchil va samarali rivojlanyapti. Chunki xalqlarimizning azaldan maqsadlari, qarash va intilishlari o‘xshash.

Ikki davlat rahbarlari o‘rtasidagi doimiy muloqotlar, ular o‘rtasida imzolangan davlatlararo kelishuvlar o‘zaro munosabatlarning huquqiy asosini tashkil etadi. Xalqaro tashkilotlar, jumladan, BMT, Islom hamkorlik tashkiloti, ayniqsa, Turkiy davlatlar tashkiloti doirasida ham faol hamkorlik yo‘lga qo‘yilgan bo‘lib, bu nafaqat davlatlarimiz, mintaqalararo aloqalar rivojida ham muhim ahamiyat kasb etmoqda. Prezidentimizning Ozarbayjonga qilgan navbatdagi davlat tashrifi, shubhasiz, ikki qardosh xalqlar o‘rtasidagi munosabatlarda yangi davrni boshlab berdi.

Dunyo bugun bir mintaqada joylashgan yoki qo‘shni, hatto qardosh davlatlar o‘rtasida ham munosabatlar buzilib, bir-biriga adovat qilayotganiga guvoh bo‘lyapti. Tarixi, qadriyatlari, til va madaniyati bir-biriga yaqin bo‘lgan ikki turkiy xalq — O‘zbekiston va Ozarbayjon esa dunyoga qardoshlik munosabatlari qanday bo‘lishi kerakligini amalda ko‘rsatyapti.

Shu o‘rinda xalqlarimizning ko‘plab dolzarb global va mintaqaviy muammolar bo‘yicha pozitsiyalari ham mos kelishini alohida qayd etish joiz. Ya’ni, O‘zbekiston ham, Ozarbayjon ham barcha o‘tkir muammo va ziddiyatlar faqat tinch yo‘l bilan, diplomatik sa’y-harakatlar orqali hal etilishi tarafdori.

Ta’kidlash lozim, navbatdagi oliy darajadagi tashrifga ikki tomonda ham alohida tayyorgarlik ko‘rildi. Birinchi Parlamentlararo forum, Hukumatlararo komissiya yig‘ilishi, hududlar va rektorlar forumlari, siyosiy maslahatlashuvlar, qator madaniy tadbirlar muvaffaqiyatli o‘tkazildi. Oliy darajadagi muzokaralarda esa ikki mamlakat o‘rtasida Ittifoqchilik munosabatlari to‘g‘risidagi shartnomani keng ko‘lamda amalga oshirishga alohida e’tibor qaratildi. O‘zaro savdo va investitsiyalar hajmini yaqin yillarda 1 milliard dollarga yetkazish bo‘yicha qo‘shma amaliy choralar ko‘rishga kelishib olindi. Savdo va kooperatsiyani rag‘batlantirish bo‘yicha alohida dastur qabul qilindi.

Boku shahrida “O‘zbekiston” bog‘i qurilishiga start beriladi. 4,5 gektar maydonda O‘zbekistonning boy madaniyati va an’analarini namoyish etadigan ulkan majmua barpo etiladi. Mamlakatimizning Ozarbayjondagi elchixonasi yangi binosi ochildi. Shular bilan bir vaqtda O‘zbekistonda bo‘lajak “Ozarbayjon” bog‘i va Kaspiy dengizining g‘arbiy sohilida noyob “Sea Breeze” sayyohlik majmuasi loyihalari faol tayyorlanayotgani ta’kidlandi.

Joriy yilda davlatlarimiz o‘rtasida diplomatik munosabatlar o‘rnatilganiga 30 yil to‘ldi. Tomonlar shu munosabat bilan o‘tkaziladigan yirik tadbirlar, konsert va yoshlar forumlarini birgalikda o‘tkazishga kelishib oldilar.

Shu o‘rinda Iqtisodiy hamkorlik tashkilotining 17-sammiti xususida to‘xtalib o‘tadigan bo‘lsak, davlatimiz rahbari o‘z nutqida bir qator muhim tashabbuslarni ilgari surganini alohida qayd etish joiz. Eng avvalo, xavfsizlik va barqaror taraqqiyotga tahdid solayotgan xavf-xatarlar qayd etilib, mojaro va nizolarni diplomatiya va konstruktiv muzokaralar yo‘li bilan hal etish muhim ekani yana bir bor ta’kidlandi.

Albatta, O‘zbekiston Prezidentining Ozarbayjonga safari yuqorida ta’kidlaganmizdek, o‘zaro munosabatlarimizda yangi tarixiy sahifalarni ochishi, shubhasiz.

Zuhra MIRG‘OZIYEVA,

Oliy Majlis Qonunchilik palatasi deputati