Namanganda “Usmon Nosir xiyoboni” ochildi

Otashin shoir, tarjimon va dramaturg Usmon Nosir tavalludining 110 yilligi munosabati bilan Namangan muhandislik-texnologiya institutida “Usmon Nosir xiyoboni” ochildi.

Jamoatchilik, shoir va yozuvchilar, partiya vakillari, jurnalist va dramaturglar ishtirokida o‘tgan xiyobonning ochilish marosimida institut rektori, viloyat Kengashi deputati Odiljon Mamatkarimov so‘zga chiqib, Usmon Nosir hayoti va ijodiy faoliyati haqida gapirdi.

80 sotixni egallagan xiyobonga 300 tupdan ortiq manzarali daraxt ko‘chatlari o‘tqazilib, zamonaviy o‘rindiqlar o‘rnatildi. Talabalar tomonidan yasalgan Usmon Nosir byusti, adabiyot burchaklari shoir tavalludiga munosib sovg‘a bo‘ldi.  Shuningdek, xiyobon hududi yuqori tezlikdagi internet bilan taʼminlangan bo‘lib, yoz oylarida tashqi kutubxona tashkil etilishi rejalashtirilgan.

Tantanali marosimda “Talabalar teatr studiyasi” tomonidan sahnalashtirilgan “Usmon Nosir” spektaklidan parcha namoyish etildi. Shoir ijodidan sheʼrlar o‘qilib, “Usmon Nosir mening nigohimda” mavzusida rasmlar tanlovi hamda Axborot resurs markazi tomonidan badiiy adabiyotlar ko‘rgazmasi tashkil etildi.