Samarqand sammiti turkiy davlatlar hamkorligini yanada kengaytiradi

Joriy yilning 10-11-noyabr kunlari Samarqandda Turkiy davlatlar tashkilotining birinchi sammiti o‘tkazildi. Sammitda Prezidentimiz Shavkat Mirziyoyev nutq so‘zlab, xalqaro hamjamiyat hamda turkiy davlatlar eʼtiboriga mintaqaviy va global ahamiyatga ega dolzarb masalalar yuzasidan bir qator tashabbus va takliflarni bildirdilar. Sammit ishtirokchilari tomonidan davlatimiz rahbari ilgari surgan tashabbuslar qo‘llab-quvvatlandi.

Davlatimiz rahbari “Qadim turkiy zamin ming yillar davomida Sharq va G‘arbni tutashtirib, jahon sivilizatsiyalarini bir-biriga yaqinlashtirib, dunyo madaniyatlarini boyitib kelgan. Biz Turkiy dunyo buyuk tarixining yorqin sahifalari ulug‘ ajdodlarimiz tomonidan birgalikda yaratilgani bilan haqli ravishda faxrlanamiz. Ana shunday bebaho merosni saqlab qolish, uni chuqur o‘rganib, kelgusi avlodlarimizga bezavol yetkazish barchamiz uchun eng asosiy vazifadir”, – dedi Prezidentimiz.

Albatta, turkiy davlatlar umumiy o‘tmishga ega, tili, dini, madaniyati va qadriyatlari bir-biriga juda yaqin. Shunday ekan mamlakatlarimizning o‘zaro iqtisodiy, siyosiy, madaniy aloqalarini yana-da kengaytirish bugungi kunning dolzarb vazifasidir. So‘nggi yillarda bu yo‘lda tashkilot doirasida bir qancha ishlar amalga oshirildi. Lekin hali ishga solinmagan imkoniyatlar va amalga oshirilishi lozim bo‘lgan qator vazifalar mavjud.

Shundan kelib chiqqan holda davlatimiz rahbari tashkilot nufuzini yanada mustahkamlash va tarixi, tili va madaniyati mushtarak bo‘lgan qardosh xalqlarimiz va davlatlarimiz o‘rtasidagi hamkorlikni yuksak pog‘onaga olib chiqish lozimligini alohida taʼkidladilar.

Maʼlumki, mamlakatimiz taklifi bilan 2022-yil Turkiy davlatlar tashkiloti doirasida “Yoshlar tashabbuslarini qo‘llab-quvvatlash yili”, deb eʼlon qilingan  va uning doirasida Buxoro shahri – Turkiy dunyo yoshlar poytaxti maqomiga ega bo‘lgan edi.

Prezidentimiz mazkur yo‘nalishga alohida eʼtibor qaratib, kelgusi yili yurtimizda turkiy dunyo yoshlarining ilm va innovatsiyalar xalqaro kongressini o‘tkazishni, uning doirasida innovatsiya va taʼlim vazirlari, oliygohlar rektorlari va yosh yetakchilar, iqtidorli yoshlar, Tashkilot oqsoqollarining keng qamrovli uchrashuvlarini tashkil etish lozimligini taʼkidlab, Tashkilot Bosh kotibining yoshlar masalalari bo‘yicha o‘rinbosari lavozimini joriy etish taklifini bildirdi.

Taʼkidlash lozim, turkiy davlatlarning madaniy aloqalari tobora rivojlanib bormoqda. Bu borada tashkilotga aʼzo va kuzatuvchi mamlakatlar adabiyotining sara namunalaridan iborat 100 jildli “Turkiy adabiyot durdonalari” to‘plamining o‘zbek tilida nashr qilinganligi muhim o‘rin tutadi. Shuning uchun Davlatimiz rahbari “Ushbu bebaho maʼnaviy xazinani barcha aʼzo va kuzatuvchi davlatlar tillarida ham chop etsak, qardosh ellarimizni, avvalambor, yosh avlodlarimizni o‘zaro yaqinlashtirish uchun mustahkam zamin yaratgan bo‘lar edik”, deya alohida eʼtirof etdilar. Shu maʼnoda, Samarqand sammiti turkiy davlatlar o‘rtasidagi har tomonlama aloqalar rivojini yangi bosqichga olib chiqishi shubhasiz.

Tajibay ROMANOV,

partiyaning Qoraqalpog‘iston Respublikasi Kengashi raisi