O‘zbekiston mustaqillik yillarida erkin va suveren taraqqiyot yo‘liga chiqdi, milliy manfaatlar ustuvor bo‘lgan mustaqil davlat sifatida shakllandi. Istiqlol xalqning siyosiy, ijtimoiy va iqtisodiy hayotini tubdan o‘zgartirdi. Eng muhimi, fuqarolar taqdiriga daxldor qarorlarni qabul qilish, ichki islohotlarni amalga oshirish va tashqi siyosatni yuritish borasida to‘liq mustaqillikka ega bo‘ldi.

10-iyul kuni Prezident qarori bilan Mustaqillikning 34 yilligiga tayyorgarlik ko‘rish bo‘yicha qaror qabul qilindi. Unga ko‘ra, bayram tadbirlari “Vatan uchun, millat uchun, xalq uchun!” shiori ostida o‘tkazilishi belgilandi. Bu g‘oya mamlakatda davlat va jamiyat hamjihatligini mustahkamlashga, millatning tarixiy ongi va istiqlol qadriyatini yuksaltirishga xizmat qilishi, shubhasiz.

Qaror bilan xalqimizning ma’naviy dunyosi, vatanparvarlik va milliy iftixor tuyg‘ularini aks ettiradigan “Ona diyor — ranglar jilosida”, “Vatan uchun yashaylik!”, “Eng ulug‘, eng aziz” kabi ko‘rik-tanlovlar, madaniy-ma’rifiy tadbirlarni o‘tkazish ham belgilangan bo‘lib, bu tadbirlar bayramni keng nishonlash bilan birgalikda, odamlarga mustaqillikning qadriga yetish va uni asrab-avaylashda barcha birdek mas’ul ekanligini anglatishda muhim o‘rin tutadi.

Bayram arafasida Qoraqalpog‘iston Respublikasi, viloyatlar, shahar va tumanlarda o‘tkaziladigan ma’naviy-ma’rifiy tadbirlar, ilmiy anjumanlar, adabiy-badiiy kechalar, milliy kino kunlari va sport musobaqalarida odamlar faol ishtirok etib, bu kunni sayil tarzida xursandchilik bilan o‘tkazish an’anaga aylanib ulgurdi.

Darhaqiqat, Istiqlol bebaho ne’mat. Uni ko‘z qorachig‘iday asrash, ayniqsa, bugungi global xatarlar, geosiyosiy beqarorlik va geoiqtisodiy xavflar, ertaga nima bo‘lishini aytib bo‘lmaydigan bir davrda juda muhim. Bunday sharoitda mustaqillik nafaqat baxt, balki katta mas’uliyatdir.

Shu bois har bir fuqaro o‘zini mamlakat taqdiriga daxldor, deb his etishi, faol fuqarolik pozitsiyasiga ega bo‘lishi talab etiladi. Bu – mustaqillikni asrab-avaylash va uni kelajak avlodlarga munosib tarzda yetkazishning yagona kafolatidir.

Shunday ekan, bu jarayonda xalqimiz, aholimizning munosabati qanday bo‘lishi kerak?

Fikrimcha, avvalo, har bir inson o‘zini Vatan, istiqlol va millat taraqqiyoti uchun javobgar, deb his qilishi, daxldorlik tuyg‘usi yanada kuchli bo‘lishi lozim. Shuningdek, mustaqillikning qadrini anglash va unga munosib hayot kechirish, yosh avlod qalbida milliy faxr va vatanparvarlik tuyg‘ularini mustahkamlash choralariga e’tiborni kuchaytirish kerak. Ayniqsa, yoshlarni Yangi O‘zbekiston bunyodkorlari sifatida tarbiyalash, ularga zamonaviy bilim va texnologiyalarni o‘rgatish, ularni qo‘llab-quvvatlashga qaratilgan vazifalar sobitqadamlik bilan amalga oshirib borilishi muhim sanaladi.

Bu yo‘lda barcha darajadagi institutsional tuzilmalar — oila, mahalla, ta’lim muassasalari, fuqarolik jamiyati institutlari, ommaviy axborot vositalari, parlament — barcha-barchasi hamjihatlikda ish olib borishi zarur. Zero, Istiqlol g‘oyasi xalqimizni birlashtiruvchi mayoq, hech kim yana qaytadan istibdod bo‘yinturug‘i bo‘yniga osilishini istamaydi.

O‘zbekiston bugun katta yo‘lga chiqqan va ortga qaytmaydi, o‘z yo‘lida davom etib, yanada kuchli va mustahkam bo‘lib, taraqqiyot sari ildamlamoqda. Bu yo‘lda barqaror taraqqiyot va global raqobatda munosib o‘rin egallashga intilayotgan davlatga aylandi. Buning uchun esa xalqning yakdilligi, faol ishtiroki va kelajakka bo‘lgan ishonchi asosiy omil hisoblanadi.

Azamat PARDAYEV,

Oliy Majlis Qonunchilik palatasi deputati