Ma’lumki, “Milliy tiklanish” demokratik partiyasining Saylovoldi dasturida milliy o‘zlikni anglash, tarixiy xotirani asrash va merosni yosh avlodga yetkazish ustuvor yo‘nalish sifatida belgilangan. Ushbu yo‘nalishda esa partiyaning hududiy Kengashlari tomonidan doimiy ravishda madaniy meros obyektlariga alohida e’tibor qaratilib kelinadi. Partiyaning Andijon viloyat Kengashi deputatlik guruhi tominidan o‘tkazilgan davra suhbatida viloyat Madaniy meros boshqarmasining 2024-yilda amalga oshirgan ishlari hamda 2025-yilning o‘tgan olti oylik yakunlari yuzasidan ma’lumotlar berilib, kelgusida madaniy merosni muhofaza qilish va ushbu yo‘nalishda amalga oshirilishi lozim bo‘lgan chora-tadbirlar bo‘yicha takliflar bildirildi.

Ma’lum qilinishicha, hozirgi kunda Andijon viloyatidagi 422 ta obyekt Vazirlar Mahkamasining 846-sonli qaroriga asosan Moddiy madaniy merosning ko‘chmas mulk obyektlari milliy ro‘yxatiga kiritilgan. Ulardan 221 tasi arxeologiya, 74 tasi arxitektura, 42 tasi esa monumental san’at yodgorliklari hisoblanadi.

Eshituv davomida deputatlar boshqarmaning so‘nggi yillarda olib borgan ishlari va ularning natijalarini tanqidiy tahlil qildilar. Xususan, ayrim yodgorliklarning bugungi kunda qarovsiz holga kelib qolganligi, ularning muhofazasiga e’tibor yetarli emasligi alohida ta’kidlandi. Natijada, deputatlar tomonidan tegishli tashkilot va idoralarga deputatlik so‘rovlari yuborish, har bir obyekt bo‘yicha joylarga chiqqan holda o‘rganishlar o‘tkazish va holatni huquqiy asosda tartibga solish bo‘yicha choralar belgilandi.

Shuningdek, deputatlar tomonidan madaniy meros obyektlari ro‘yxatiga kiritilgan 7 ta shifobaxsh buloq atrofini obodonlashtirish, ularni ichki va ziyorat turizmi uchun jozibador maskanlarga aylantirish bo‘yicha takliflar bildirildi. Jumladan, bu yo‘nalishda Oliy Majlis Qonunchilik palatasi huzuridagi Jamoat fondining Andijon viloyat bo‘limi grant loyihalarida ishtirok etish tashabbusi ilgari surildi.

Muhokamalar chog‘ida yana bir muhim masalaga e’tibor qaratildi. Ba’zi madaniy meros obyektlari ro‘yxatiga kiritilgan, biroq tuman hokimliklarining qaroriga asosan qabriston sifatida foydalanilayotgan yodgorliklar holati yuzasidan Andijon viloyat Kengashining navbatdagi sessiyasida alohida masala tarzida ko‘rib chiqilishi belgilandi.

Madaniy meros – bu faqat o‘tmish yodgorligi emas, balki xalqning milliy ruhiyati, tafakkuri va madaniy barkamolligidir. Ushbu yo‘nalishdagi har qanday harakat – milliy tiklanish va taraqqiyot sari tashlangan qadamdir.

                                                                                              
Partiyaning Andijon viloyat Kengashi
matbuot xizmati