“Qadriyatlarga tayangan taraqqiyot!” shiorini qo‘llab-quvvatlovchi vatanparvar va bunyodkor xalqimiz vakillarini o‘z elektorati, deb hisoblaydigan Oliy Majlis Qonunchilik palatasidagi “Milliy tiklanish” demokratik partiyasi fraksiyasi joriy yilning o‘tgan birinchi yarim yillikdagi faoliyatida asosiy e’tiborni elektorat manfaatlariga qaratib, bu borada muhim tashabbuslarni ro‘yobga chiqardi. Xususan, maktabgacha ta’lim va umumiy o‘rta ta’lim muassasalaridagi o‘qituvchi hamda tarbiyachilarning malakasini oshirish masalalari hamda turizm sohasini tartibga soluvchi normativ-huquqiy hujjatlarni takomillashtirish bo‘yicha tizimli chora-tadbirlar mufassal ko‘rildi.

Prezidentimizning 2024-yil 18-noyabrdagi Oliy Majlis Qonunchilik palatasining birinchi majlisidagi ma’ruzasida vazirliklar bilan ishlashda yaqindan hamkorlik qilish muhimligi, unda partiyaviy va fraksiyaviy intizomni mustahkamlash masalasi asosiy e’tiborda bo‘lishi kerakligi alohida ta’kidlab o‘tilgan edi. Ayniqsa, g‘oyalar kurashini jonlantirishda har bir siyosiy partiya fraksiyalarining o‘rni kata ahamiyat kasb etishi qayd etilgandi.

Shu yil 5-may kuni “Milliy tiklanish” demokratik partiyasi hamda Tadbirkorlar va ishbilarmonlar harakati — O‘zbekiston Liberal-demokratik partiyasi fraksiyalari o‘rtasida “Taraqqiyot bloki”ni tashkil etish bo‘yicha bitim imzolangani amaliy sa’y-harakatlardan biri bo‘ldi.

Binobarin, ushbu Blok barqaror iqtisodiy o‘sish orqali aholining farovonligini ta’minlash, milliy manfaatlarni qat’iy himoya qilish hamda ko‘p asrlik milliy-tarixiy tajribaga tayangan holda faoliyat yuritishni o‘zining asosiy ustuvor vazifasi, deb biladi.

Hisobot davrida fraksiya tomonidan qonun ijodkorligi, nazorat-tahlil faoliyati hamda boshqa muhim tadbirlarni samarali tashkil etish maqsadida 2025 yilga mo‘ljallangan chora-tadbirlar rejasi ishlab chiqilib, qonun ijodkorligi yo‘nalishida bir qator tashabbuslar ilgari surildi. Jumladan, bitta qonunchilik tashabbusi huquqi asosida qonun loyihasi ishlab chiqilib, Qonunchilik palatasiga kiritildi. Shuningdek 6 ta qonun loyihasi hamtashabbus huquqi asosida boshqa fraksiya a’zolari bilan hamkorlikda quyi palataga kiritildi.

Ushbu qonun loyihalarini ishlab chiqishda har bir fuqaroning huquq va manfaatlarini to‘laqonli ifoda etish, joylardagi o‘rganishlar davomida aniqlangan muammo va kamchiliklarga yechim topish, shuningdek, fuqarolar bildirgan taklif hamda fikr-mulohazalarga alohida e’tibor berildi. Jumladan, 110 ga yaqin qonun loyihasi muhokamalari qizg‘in kechgan yig‘ilishlarda deputatlar tomonidan saylovchilar huquq va manfaatlarini aks ettirishga qaratilgan muhim takliflar qat’iy bildirildi. Shundan 60 ga yaqin takliflar loyihalarni takomillashtirish jarayonida inobatga olindi. Joylarda esa 12 ta qonun loyihasining muhokamasi yuzasidan 3 mingga yaqin fuqarolar ishtirokida 86 ta uchrashuv tashkil etilib, bildirilgan 20 dan ortiq takliflar qonun loyihalarini ishlab chiqish hamda takomillashtirish jarayonida inobatga olindi.

Ayonki, faoliyatimizda parlament nazorati muhim o‘rinni egallaydi. O‘tgan vaqt davomida fraksiya a’zolari tomonidan saylovchilarning huquqlari va qonuniy manfaatlarini ta’minlash borasidagi ishlarga jiddiy e’tibor qaratilib, joylardagi nazorat-tahlil tadbirlari, saylov okruglaridagi o‘rganishlar davomida aniqlangan dolzarb masalalar yuzasidan davlat va xo‘jalik boshqaruvi organlari rahbarlariga jami 15 ta deputat so‘rovi yuborildi.

Bundan tashqari, joylardagi tizimli muammolar, qonun va qonunosti hujjatlarning ijro etilish holati yuzasidan tegishli mansabdor shaxslarning hisobotlari fraksiya majlislarida doimiy tarzda eshitildi.

Ma’lumki, fraksiya yig‘ilishlarida qonun loyihalari maromiga yetkazilib, muhokama qilinadi va har bir loyihada fraksiya nuqtayi nazari aks ettirilishiga e’tibor qaratiladi. O‘tgan davrda fraksiyaning 29 ta yig‘ilishi o‘tkazilib, unda 210 ga yaqin muhim masalalar muhokama qilindi, qonun ijodkorligi faoliyati va parlament nazoratiga oid aniq taklif hamda tashabbuslar ilgari surildi. Hududlardagi o‘rganishlar yakuni yuzasidan tegishli qarorlar qabul qilindi.

Bugun xalq bilan muloqot davlatimiz siyosatining ustuvor yo‘nalishlaridan biriga aylandi. Negaki, aynan fuqarolar bilan uchrashish, ularning murojaatlarini tinglash mavjud muammolarning o‘z vaqtida yechim topishiga imkon beradi.

Shu bois joylarda aholi bilan yuzma-yuz muloqot qilish, fuqarolarni o‘ylantirib kelayotgan tizimli muammolarni aniqlab, hal etish choralarini ko‘rish, murojaatlar bilan ishlash hamda qonun loyihalarini takomillashtirishda fuqarolarning takliflarini ko‘rib chiqish va inobatga olishga alohida e’tibor qaratildi. Hududlarda o‘tkazilgan nazorat-tahlil tadbirlarda jamiyat hayoti uchun muhim bo‘lgan qonun loyihalarining ijro etilish holati, mavjud tizimli muammolar, shuningdek, ijtimoiy-iqtisodiy sohalarda olib borilayotgan islohotlar samaradorligi atroflicha o‘rganib borildi. Mazkur o‘rganishlar davomida 890 ga yaqin uchrashuv o‘tkazilib, ularda 20 mingdan ortiq aholi qamrab olindi, 500 ga yaqin xonadonga tashrif buyurildi hamda 150 ga yaqin tadbirkorlik subyektlari bilan o‘zaro muloqot o‘tkazildi.

O‘tgan vaqt davomida fraksiya a’zolari nomiga yuridik va jismoniy shaxslardan jami 67 ta, shu jumladan, 24 ta yozma, 43 ta elektron shakldagi murojaat kelib tushgan bo‘lsa, ularning 23 tasi ko‘rib chiqish uchun tegishliligi bo‘yicha mutasaddi tashkilot va idoralarga yuborildi, 6 tasi ijobiy hal etildi hamda 36 ta murojaatga huquqiy tushuntirishlar berildi.

Prezident Shavkat Mirziyoyev raisligida Korrupsiyaga qarshi kurashish bo‘yicha milliy kengashning korrupsiyaning oldini olish bo‘yicha ishlar natijadorligi va kelgusidagi ustuvor vazifalarga bag‘ishlangan kengaytirilgan yig‘ilish, shuningdek, islohotlar natijadorligi, hududlarda ishlarning borishi va aholini qiynayotgan masalalar tahlili bo‘yicha o‘tkazilgan videoselektor yig‘lishida belgilangan vazifalardan kelib chiqib, joylarda jamoatchilik va deputatlik nazorati olib borildi.

Tahlillar shuni ko‘rsatmoqdaki, fraksiya va partiya hamkorligining salmog‘i yildan-yilga ortmoqda. O‘tgan vaqt davomida fraksiyaning partiya bilan o‘zaro aloqalari mutlaqo yangicha ko‘rinishda yo‘lga qo‘yilib, ular tomonidan joylardagi muammo va kamchiliklarni hal etishda natijadorlikka erishish, shu jumladan, maktabgacha ta’lim muassasalari tarbiyachilari va umumiy o‘rta ta’lim tizimida faoliyat olib borayotgan tarbiyachi pedagoglarni qo‘llab-quvvatlash, yoshlar va ayollar muammolariga samarali yechim topishga qaratilgan “Deputat bilan yuzma-yuz”, “Xizmat beminnat”, “Uyma-uy loyihasi”, “Deputat ayollar klubi” hamda “Siyosiy jarayonlar tahlil klubi”, “Siyosatchi ayollar” klubi, “Toza likopcha” loyihalari muntazam ravishda amalga oshirildi.

Fraksiya va partiya hamkorligida jami 21 ta tadbir tashkil etildi. Jismoniy va yuridik shaxslardan kelib tushgan murojaatlar hamda joylarda deputatlar tomonidan tashkil etilgan sayyor qabullarda fuqarolar tomonidan jami 1070 ta murojaat kelib tushgan bo‘lib, shundan 400 dan ortig‘i ijobiy hal etildi, 167 ta murojaat ko‘rib chiqish uchun tegishliligi bo‘yicha mutasaddi tashkilot va idoralarga yuborildi.

“Milliy tiklanish” demokratik partiyasi fraksiyasi mamlakatdagi ijtimoiy, siyosiy va madaniy jarayonlarda faol ishtirok etib, qator muhim tashabbuslarni ilgari surishda davom etadi. Fraksiya keyingi faoliyatida ham milliy qadriyatlar, ma’naviy merosni asrash, yosh avlod tarbiyasi va madaniyat sohasini rivojlantirishga qaratilgan qonunchilik takliflari hamda nazorat-tahlil ishlariga alohida e’tibor qaratib, elektorat manfaatiga xizmat qiluvchi qonunchilikni takomillashtirish va joylarda parlament nazoratini yanada kuchaytirishga qaratilgan amaliy loyihalarga e’tibor qaratadi.

Alisher QODIROV,

Oliy Majlis Qonunchilik palatasidagi

“Milliy tiklanish” DP fraksiyasi rahbari