30-iyul – Xalqlar do‘stligi kuni munosabati bilan “Milliy tiklanish” demokratik partiyasining Buxoro viloyati Kengashi tomonidan Buxoro davlat universitetida ma’naviy-ma’rifiy tadbir tashkil etildi. Ushbu tadbir O‘zbekistonda istiqomat qilayotgan turli millat va elat vakillari o‘rtasidagi o‘zaro do‘stlik, hamjihatlik va bag‘rikenglik munosabatlarini yanada mustahkamlash, xalqlar o‘rtasidagi totuvlikni targ‘ib qilish maqsadida o‘tkazildi.

Uchrashuvda so‘zga chiqqan viloyat Kengashi raisi Rajabboy Hasanov barcha ishtirokchilarni Xalqlar do'stligi kuni munosabati bilan samimiy tabriklar ekan, o‘zbek xalqi azaldan do‘stlik, sadoqat, mehr-oqibat va birdamlik kabi ezgu tuyg‘ularni o‘zining milliy qadriyatlari qatorida e’zozlab kelayotganini ta’kidladi. Shuningdek, bu an’analarni asrab-avaylash va yanada yuksaltirish har bir fuqaroning muhim vazifasi ekanini alohida qayd etdi.

Shuningdek tadbirda Xalqlar do'stligi kuni dunyo xalqlari o‘rtasida tinchlik, millatlararo hamjihatlik va totuvlikni mustahkamlash, insonlar o‘rtasida o‘zaro hurmat va ishonchni oshirishda muhim ahamiyatga ega ekani ta’kidlandi.

Milliy madaniy markazlar vakillari e’tibor va e’tirof uchun minnatdorlik izhor etib, kelgusida ham yurtimizdagi millatlararo do‘stlik va birdamlikni mustahkamlashda o‘z hissalarini qo‘shishga tayyor ekanliklarini bildirdilar.

“Milliy tiklanish” demokratik partiyasi Buxoro viloyati Kengashi Axborot xizmati