Bugun “Milliy tiklanish” demokratik partiyasi Markaziy kengashining navbatdagi II Plenumi bo‘lib o‘tdi. Unda Markaziy va hududiy kengash vakillari, fraksiya a’zolari, mahalliy kengash deputatlari ishtirok etdi. Plenumda partiyaning hamda Oliy Majlis Qonunchilik palatasidagi partiya fraksiyasining 2025-yil birinchi yarim yil faoliyati yakunlari muhokama qilinib, 2025-yilning ikkinchi yarim yilllikdagi faoliyati asosiy yo‘nalishlari belgilab olindi.

“Milliy tiklanish” demokratik partiyasi va fraksiyasi tomonidan o‘tgan davrda elektorat manfaatlarini himoya qilish, Saylovoldi dasturida ilgari surilgan g‘oya va tashabbuslarni amalga oshirish, maktabgacha ta’lim va umumiy o‘rta ta’lim o‘qituvchi hamda tarbiyachilarining malakasini oshirish va turizm sohasini tartibga soluvchi normativ-huquqiy hujjatlarni takomillashtirish bo‘yicha tizimli chora-tadbirlar amalga oshirildi.

Aytish kerakki, o‘tgan davr mobaynida fraksiya a’zolari qonunchilik faoliyatida faol ishtirok etib, 1 ta qonun loyihasi Qonunchilik palatasiga kiritildi, 6 ta qonun loyihasi esa fraksiya a’zolarining hamtashabbusligida Qonunchilik palatasiga kiritildi. Shu bilan birga muhim ijtimoiy-iqtisodiy ahamiyatga ega 12 ta qonun loyihasi joylarda tashkil etilgan 86 ta uchrashuvlarda fuqarolar bilan muhokama qilinib, fuqarolarning 20 dan ortiq takliflari qonunlarni ishlab chiqish va takomillashtirish jarayonida inobatga olindi.

Bundan tashqari fraksiya yig‘ilishlarida 4 ta eshituv amalga oshirildi va Fraksiya tomonidan 1 ta Parlament so‘rovi, saylovchilarning muammolarini hal etishga qaratilgan 15 ta deputatlik so‘rovi tegishli tashkilotlarga yuborildi. Joylarda tashkil etilgan sayyor qabullar doirasida esa 1070 ta fuqaro murojaati qayd etilib, shundan 400 tasi ijobiy hal etildi, 167 tasi tegishli tashkilotlarga yuborildi.

Ma’lumki partiyaning 2025-2029-yillarga mo‘ljallangan Saylovoldi dasturida 150 ga yaqin vazifalar belgilangan bo‘lib, shundan bugunga qadar 7 tasi Qonunlarda, 17 ta vazifa Prezident Qarorlarida, 12 tasi Prezident Farmonlarida, 22 tasi Vazirlar Mahkamasi va vazirliklarning qarorlarida hamda 36 ta vazifa “O‘zbekiston-2030” strategiyasini 2025-yilda amalga oshirishga oid Davlat dasturida belgilangan vazifalarda o‘z aksini topdi. Bundan tashqari belgilangan vazifalar qonunchilik tashabbuslari, Parlament va jamoatchilik eshituvi, nazorat tahlil o‘rganishlari, partiyaning loyihalari va aksiyalari orqali ijrosi ta’minlanmoqda. 

Deputatlik guruhlari tashabbusi bilan qonunchilikni takomillashtirish va amaldagi normativ-huquqiy hujjatlarda belgilangan vazifalar ijrosini nazorat-tahlil tartibida o‘rganish, saylovchilarni o‘ylantirayotgan muammolarni hal etishda amaliy ko‘mak ko‘rsatish maqsadida 304 ta masala sessiya kun tartibiga kiritildi. Shundan, 227 ta qaror ijrosi ta’minlanib, 75 tasining ijrosi nazoratga olindi. 493 ta masala doimiy komissiya yig‘ilishlariga olib chiqildi, shundan, 379 tasining ijrosi ta’minlanib, 98 tasining ijrosi nazoratga olindi.

Partiyaning “Ayollar qanoti” tomonidan “Siyosatchi ayollar klubi”, “Toza likopcha”, “Biz kitobxon xalqmiz” va “Boylikni bolalikdan asrang” kabi bir qator xalqchil loyihalar amalga oshirilib, asosiy e’tibor Saylovoldi dasturida belgilangan vazifalar ijrosiga qaratildi.

Bugungi kunda Oliy Majlis Qonunchilik palatasi huzuridagi Yoshlar parlamentiga partiyamizdan 29 nafar a’zolar saylangan bo‘lib, ular “Ustoz-shogird” an’anasi asosida partiya fraksiyasi a’zolariga biriktirilgan va doimiy ravishda fraksiya faoliyatida ishtirok etib kelmoqda.  

O‘quv-tadqiqot va tahlil markazi tomonidan bir qator loyihalarni hamkor tashkilotlar bilan birgalikda amalga oshirish bo‘yicha memorandumlar imzolandi va yangi o‘quv dasturlari yo‘lga qo‘yildi.

Ta’kidlash  lozimki, o‘tkazilgan har bir loyiha va amaliy ishlarning mazmun-mohiyatini saylovchilarga yetkazishda ommaviy axborot vositalarining o‘rni muhim hisoblanadi. Hisobot davrida “Milliy tiklanish” gazetasining 25 ta soni chop etilib, 75 000 dan ortiq o‘quvchilarga bepul tarqatildi. Jami 3499 marotaba OAVda chiqishlar qilingan bo‘lsa, shundan, televideniyeda 70 marotaba, radioda 34 marotaba, bosma nashrlarda 198 marotaba, veb-saytlarda 409 marotaba, ijtimoiy tarmoqlarda 2788 marotaba dolzarb va kun muhokamasiga sabab bo‘layotgan xabarlarga munosabatlar bildirildi hamda o‘tkazilgan tadbirlar yuzasidan axborotlar berildi.

Xulosa qilib aytganda, Plenumda partiya faoliyatini samarali tashkil etish hamda belgilangan vazifalar ijrosini ta’minlash maqsadida barcha darajadagi deputatlar faoliyatini tanqidiy tahlil etib borish, aholini qiynayotgan dolzarb masalalarni parlament muhokamalariga olib chiqish, elektorat bilan muloqotni kuchaytirish ustuvor vazifa ekani, endi faqat natija uchun ishlanishi ta’kidlandi.

Plenumda kun tartibiga kiritilgan boshqa masalalar ham muhokama qilinib, tegishli qarorlar qabul qilindi.

MTDP Markaziy kengashi Axborot xizmati