Birlashgan Millatlar Tashkilotining Dengizga chiqish imkoni bo‘lmagan rivojlanayotgan mamlakatlar bo‘yicha uchinchi konferensiyasi doirasida O‘zbekiston Prezidenti Shavkat Mirziyoyevga Turkmanistonning “Hamkorlikni rivojlantirishga qo‘shgan hissasi uchun” ordenini tantanali topshirish marosimi bo‘lib o‘tdi.

Turkmaniston tomonidan davlatimiz rahbariga bunday yuksak ordenning topshirilishi — bu nafaqat Shavkat Mirziyoyev shaxsiga ko‘rsatilayotgan yuksak hurmat, balki butun O‘zbekiston xalqining tinchlikparvar siyosatiga, mintaqaviy barqarorlik va taraqqiyotga qo‘shgan ulkan hissasiga berilgan e’tirofdir.

Bu kabi yuksak mukofotlar Prezidentimizga birinchi marta topshirilayotgani yo‘q. So‘nggi yillarda Turkiya, Qozog‘iston, Ozarbayjon, Rossiya, Saudiya Arabistoni va boshqa qator mamlakatlar tomonidan ham davlatimiz rahbari xalqaro mukofotlar va ordenlar bilan taqdirlangan. Bu esa Shavkat Mirziyoyevning xalqaro maydondagi nufuzi, dunyodagi tinchlik, barqarorlik, hamkorlik va adolatni ta’minlashga qaratilgan tashabbuslari xalqaro miqyosda tan olinayotganining yaqqol namoyonidir.

Prezidentimiz har doim o‘z chiqishlarida o‘zaro ishonch, ochiq muloqot va manfaatlar uyg‘unligi bugungi dunyoda barqaror taraqqiyotning kaliti ekanini ta’kidlab keladi. Turkmaniston bilan munosabatlarimiz aynan mana shu tamoyillarga asoslangan. Oxirgi yillarda amalga oshirilayotgan yirik iqtisodiy va infratuzilmaviy loyihalar, transport va logistika sohalaridagi hamkorlik, shuningdek, xalqlarimiz o‘rtasidagi qardoshlik rishtalari buni yaqqol tasdiqlab turibdi.

Ashxoboddagi BMT konferensiyasi doirasida mazkur mukofotni topshirishga bag‘ishlangan marosim O‘zbekiston va Turkmaniston o‘rtasidagi strategik sheriklikning yuksak nuqtasiga aylandi. Bu nafaqat ikki mamlakat, balki butun Markaziy Osiyo uchun muhim signaldir: mintaqa davlatlari o‘z salohiyatini birlashtirib, global tashabbuslarni ilgari surishga qodir ekanini dunyoga namoyon qilmoqda.

Shu bilan birga, Prezidentimiz tomonidan turkman xalqiga yo‘llangan samimiy tabriklar va Ashxobodda bo‘lib o‘tadigan xalqaro tinchlik va ishonch yili doirasidagi global sammitga bildirilgan tilaklar ham o‘zaro siyosiy ishonch darajasining yuqoriligini ko‘rsatadi.

Senat a’zosi sifatida bugungi voqelikni ikki xalq manfaatlarini o‘ylagan, mintaqaviy mustahkamlik va farovonlikni maqsad qilgan siyosiy irodaning muvaffaqiyatli ifodasi, deb baholayman.

Qobiljon TURSUNOV, Senator