O‘zbekiston Prezidentining Turkmanistonga amaliy tashrifi doirasida o‘tkazilgan qator muhim anjuman va ikki tomonlama uchrashuvlarda mintaqaviy hamda global hamkorlikni rivojlantirishga qaratilgan bir qator tashabbuslar ilgari surildi.

Davlatimiz rahbari tashrif doirasida Turkmanboshi shahridagi «Avaza» milliy turizm hududida o‘tgan BMTning dengizga chiqish imkoni bo‘lmagan rivojlanayotgan mamlakatlar bo‘yicha uchinchi konferensiyasida ishtirok etib, logistika integratsiyasiga ko‘maklashish jamg‘armasini taʼsis etish, donor mamlakatlar, xalqaro rivojlanish institutlari va global dasturlar resursini keng jalb qilish, dengizga chiqish yo‘liga ega bo‘lmagan mamlakatlarning “Zaiflik indeksi”ni yaratish, bunda davlatlarning cheklangan imkoniyatlarini xolis ko‘rib chiqish, raqobatbardoshlik va ishbilarmonlik muhitini adolatli baholash bo‘yicha muhim takliflarni o‘rtaga tashladi.

Anjuman yakunida qabul qilingan “Avaza siyosiy deklaratsiyasi” va Harakatlar dasturi xalqaro hamkorlikdagi aniq vazifalarni belgilab, rivojlanayotgan mamlakatlar uchun amaliy yo‘l xaritasini shakllantirishga qaratilgani bilan ahamiyatli bo‘ldi.

Shuningdek, Prezidentimiz Markaziy Osiyo davlatlari rahbarlarining yettinchi Maslahat uchrashuviga tayyorgarlik masalalariga bag‘ishlangan tadbirda ham qatnashdi. Bunday uchrashuvlar mintaqa davlatlari o‘rtasidagi siyosiy muloqotni chuqurlashtirish, hududiy xavfsizlikni taʼminlash, chegaralararo aloqalar, suv-energetika resurslari va transport-kommunikatsiya sohasidagi muammolarni kelishilgan holda hal etishda o‘ziga xos platforma vazifasini o‘taydi.

Bir so‘z bilan aytganda, Prezidentimizning Turkmanistonga amaliy tashrifi nafaqat ikki tomonlama munosabatlar, balki keng mintaqaviy va xalqaro darajadagi hamkorlikni yanada kengaytirishga xizmat qilishi bilan muhim ahamiyatga ega bo‘lishi shubhasiz.

Azamat PARDAYEV,
Oliy Majlis Qonunchilik palatasidagi
“Milliy tiklanish” fraksiyasi aʼzosi