Taʼkidlash lozim, O‘zbekiston Prezidenti Shavkat Mirziyoyev Turkmanistonning Avaza milliy turizm markazida o‘tkazilgan BMTning dengizga chiqish imkoni bo‘lmagan rivojlanayotgan mamlakatlar bo‘yicha uchinchi konferensiyasida so‘zga chiqib, xalqaro ahamiyatga molik muhim taklif va tashabbuslarni ilgari surdi.

Maʼlumki, mazkur nufuzli anjumanda transport sohasidagi o‘zaro bog‘liqlikni mustahkamlash, savdo tartib-taomillarini soddalashtirish, iqlim o‘zgarishi va ekologik xavf-xatarlarga bardoshlilikni oshirish, shuningdek, Barqaror rivojlanish maqsadlariga erishish masalalari muhokama qilindi.

Prezidentimiz o‘z nutqida dengizga chiqish imkoni yo‘q davlatlarning global iqtisodiyotda to‘laqonli ishtirok etishi uchun adolatli va barqaror shart-sharoitlar yaratish zarurligini taʼkidladi. Shu munosabat bilan infratuzilmani yaxshilash, o‘zaro tranzit hamkorligini kengaytirish va xalqaro tenglikni taʼminlash lozimligini qayd etdi.

Xususan, “O‘zbekiston – Afg‘oniston – Pokiston” va “Xitoy – Qirg‘iziston – O‘zbekiston” temir yo‘l loyihalarini uyg‘unlashtirish, Tranzit kafolatlari to‘g‘risidagi global bitim ishlab chiqish, logistika integratsiyasiga ko‘maklashuvchi jamg‘arma tuzish, Zaiflik global indeksini ishlab chiqish va agrotexnologiyalarga ixtisoslashgan innovatsion xabni tashkil etish kabi aniq va amaliy takliflar bildirildi.

Tashrif doirasida Turkmaniston tomonidan Prezidentimizga “Hamkorlikni rivojlantirishga qo‘shgan hissasi uchun” ordeni topshirildi. Davlatimiz rahbari ushbu yuksak mukofotni O‘zbekiston xalqiga bo‘lgan hurmat, o‘zaro yaqinlik va mintaqaviy do‘stlikni mustahkamlashga berilgan baho sifatida qabul qildi.

Tashrifning eʼtiborli bir jihati shunda bo‘ldiki, Turkmanistonda shakllangan yuqori protokol qoidalaridan farqli ravishda Turkman xalqining milliy yetakchisi, Xalq Maslahati Raisi Gurbanguli Berdimuhamedov Shavkat Mirziyoyevni shaxsan aeroportda kuzatib qo‘ydi. Bu shubhasiz ikki davlat o‘rtasidagi o‘zaro hurmat va samimiy do‘stona munosabatlar, xalqlarimiz o‘rtasidagi chinakam qardoshlik aloqalarining yorqin namunasi bo‘ldi.

Albatta, O‘zbekiston vakillari ushbu konferensiyada faol ishtirok etib, mamlakatimizning global va mintaqaviy masalalarda qatʼiy “pozitsiya”ga egaligi, jahon hamjamiyati bilan samarali muloqotga intilishi va barqaror taraqqiyot, tinchlik hamda hamkorlikni taʼminlashga qaratilgan saʼy-harakatlarini yana bir bor namoyon etdi.

Rashid RO‘ZIBOYEV, 
Xorazm viloyat Kengashi raisi, 
Toshkent tibbiyot akademiyasi Urganch filiali direktori