Bugun yurtimizda amalga oshirilayotgan keng ko‘lamli islohotlarning asosiy maqsadi – aholining farovon hayotini ta’minlash, mamlakatimizni jahonning rivojlangan davlatlari qatoriga olib chiqishdir.

Mazkur ezgu maqsadga erishishda har bir hududning, har bir insonning o‘z o‘rni va ahamiyati bor. Shu ma’noda, Qoraqalpog‘iston Respublikasining ijtimoiy-iqtisodiy rivojlanishiga alohida e’tibor qaratilishi – bu Yangi O‘zbekiston strategiyasining muhim tarkibiy qismidir.

O‘zbekiston Respublikasi Prezidenti Shavkat Mirziyoyev tomonidan 2025-yil 14-avgust kuni qabul qilingan “Qoraqalpog‘iston Respublikasini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish to‘g‘risida”gi qarori – bu Qoraqalpog‘istonning taraqqiyotiga qaratilgan yangi imkoniyatlar eshigini ochib berdi. Bundan avval ham hududni rivojlantirish yuzasidan ko‘plab farmon va qarorlar qabul qilindi va katta o‘zgartirishlar amalga oshirildi. Ular qatorida ushbu qaror, nafaqat qoraqalpog‘istonliklarning bugungi hayotini yaxshilashga, balki, kelajak avlodlar uchun ham munosib sharoit yaratishga xizmat qiladi.

Qoraqalpog‘iston Respublikasi Jo‘qorg‘i Kengesi deputati sifatida ushbu qarorning ahamiyatini alohida ta’kidlamoqchiman. Chunki, ushbu qaror doirasida amalga oshiriladigan loyiha va chora-tadbirlar Orolbo‘yining iqtisodiy salohiyatini oshirish, yangi ish o‘rinlari yaratish, infratuzilmani yaxshilash va aholining ijtimoiy himoyasini kuchaytirishga qaratilgan. Shuningdek mazkur qaror partiyamizning Saylovoldi dasturida belgilangan maqsad va vazifalar bilan hamohangligi barcha partiyadoshlarimiz uchun ham quvonchli yangilik bo‘ldi.

Xususan, partiyamiz dasturida turizm sohasini rivojlantirishga alohida e’tibor qaratilgan. Qoraqalpog‘istonning betakror tabiati, boy tarixiy-madaniy merosi va an’analari sayyohlik uchun katta imkoniyatlarga ega. Ushbu qaror doirasida Qoraqalpog‘iston Respublikasining qadimiy, tog‘ va daryo bo‘yi hududlarida yangi turistik yo‘nalishlarning yo‘lga qo‘yilishi, Xo‘jayli tumani hududidagi “Mizdakxon” arxeologiya-arxitektura majmuasi, Qorao‘zak va Amudaryo tumanlari hududidagi “Shayx Jalil bobo” ziyoratgohi, Qorao‘zak va Amudaryo tumanlari hududidagi “Amu-qaratau” dam olish majmuasi zarur infratuzilma bilan ta’minlanishi - bu “Milliy tiklanish”partiyasining dasturiy maqsadlariga to‘la mos keladi. Ushbu loyihalarning amalga oshirilishi natijasida Qoraqalpog‘istonga sayyohlar oqimi ko‘payib, hududning iqtisodiy rivojlanishiga ijobiy ta’sir ko‘rsatadi.

Shuningdek, qaror doirasida Qoraqalpog‘istonni Qozog‘iston Respublikasining Qizilo‘rda viloyati bilan bog‘lovchi Qizilo‘rda - Taxtako‘pir avtomobil yo‘lini qurish, Qoraqalpog‘istonni Turkmanistonning Toshhovuz viloyati bilan bog‘lovchi Xo‘jayli-Toshhovuz chegara postini ochish masalalarining ko‘rib chiqilishi ham partiyamizning mintaqaviy hamkorlikni rivojlantirishga qaratilgan maqsadlariga to‘la mos keladi.

Qaror doirasida, shuningdek, 2025–2026-yillarda yalpi hududiy mahsulot hajmini o‘rtacha 6–6,5 foizga yetkazish, sanoat ishlab chiqarishi hajmini 5–6 foizga oshirish, bozor xizmatlari hajmini 15–17 foizga yetkazish, “Yashil” tamoyil asosida 11 ta ijtimoiy soha ob’ektini qurish va ta’mirlash, 151 km avtomobil yo‘lini ta’mirlash, har yili talabdan kelib chiqib, 50 nafargacha yoshning xorijda ta’lim olishini ta’minlash, davlat oliy ta’lim muassasalarida davlat granti asosida o‘qitish uchun qo‘shimcha 500 ta maqsadli kvota ajratish kabi muhim yo‘nalishlar amalga oshiriladi. Ushbu maqsadlarning ro‘yobga chiqishi Qoraqalpog‘istonning iqtisodiy salohiyatini oshirish, aholining turmush darajasini yaxshilash va yoshlarning ta’lim olish imkoniyatlarini kengaytirishga xizmat qiladi.

Biz, “Milliy tiklanish” partiyasi Qoraqalpog‘iston Respublikasi kengashi hamda barcha deputatlar mazkur qarorning samarali ijrosini ta’minlash uchun bor kuch-g‘ayratimizni safarbar etamiz. Xalq bilan muloqotni kuchaytirgan hamda ularning fikr-mulohazalarini inobatga olgan holda, loyihalarning amalga oshirilishi jarayonida shaffoflikni ta’minlaymiz va jamoatchilik nazoratini o‘rnatamiz.

Ishonamanki, Prezidentimizning ushbu qarori Qoraqalpog‘istonning ijtimoiy-iqtisodiy rivojlanishiga kuchli turtki beradi. Barchamiz ushbu qarorning samarali ijrosini ta’minlashga bor kuchimizni safarbar etamiz.

Tajibay ROMANOV,
partiyaning Qoraqalpog‘iston Respublikasi Kengashi raisi,
Jo‘qorg‘i Kenges deputat