20-avgust – Tadbirkorlar kuni munosabati bilan Prezidentimiz Shavkat Mirziyoyevning biznes subyektlari bilan ochiq muloqoti mamlakatimizda tadbirkorlikni rivojlantirishda yana bir muhim qadam bo‘ldi. Uchrashuvda so‘z yuritilgan masalalar va qabul qilingan qarorlar yurtimizda ishbilarmonlar faoliyatiga yanada keng yo‘l ochib beradi.

So‘nggi sakkiz yilda mamlakatimizga 230 milliard dollar investitsiya kirib kelib, shundan 120 milliarddan ortig‘i xorijiy sarmoyalar ekani O‘zbekiston iqtisodiyotining ochiqligi va jozibadorligidan dalolatdir. Shu bilan birga, tadbirkorlarning mingga yaqin tashabbusi qonunchilikda o‘z aksini topgani ularning davlat siyosatidagi o‘rni va ahamiyati tobora ortib borayotganini ko‘rsatadi.

Bu yil hududlarda sanoat infratuzilmasini yaxshilash uchun 1,7 trillion so‘m ajratilgani, kelgusi yilda esa bu mablag‘ 25 foizga oshirilishi ham tadbirkorlar uchun katta qo‘llab-quvvatlovdir. Shuningdek, turizm sohasini rivojlantirish maqsadida mehmonxona va maskanlar tashkil etish uchun kelgusi uch yilda 5 ming gektar yer auksionga chiqarilishi va tadbirkorlar yer uchun to‘lovdan ozod qilinishi yurtimizda turizm sohasini mutlaqo yangi bosqichga ko‘tarishga xizmat qiladi.

Prezidentimiz nutqida alohida qayd etilgan yo‘nalishlardan biri xususiy tibbiyot sohasi bo‘ldi. So‘nggi yetti yilda xususiy klinikalar soni 3,5 mingdan 8,5 mingtaga yetgani bu sohaning izchil rivojlanayotganini ko‘rsatadi. Bu sohada to‘plangan tajriba, zamonaviy texnologiyalar va malakali kadrlar sifat ko‘rsatkichlari ham keskin yaxshilanganini ko‘rsatadi.

Eng muhimi, chegara hududlarda zamonaviy tibbiyot klasterlarini tashkil etish rejalashtirilmoqda. Ularda klinika, reabilitatsiya markazi, mehmonxona va laboratoriyalar faoliyat ko‘rsatadi. Bunday loyihalarni amalga oshirish uchun davlat tomonidan 200 million dollarlik imtiyozli kredit liniyasi ochilishi, tadbirkorlarga 7 yil muddatga 3 yillik imtiyozli davr bilan 17 foizli kreditlar ajratilishi  soha vakillari uchun ulkan imkoniyatdir.

Ushbu muloqot, shubhasiz, tadbirkorlik va soha rivojida yangi bosqichning poydevori bo‘lib, ishbilarmonlar uchun yangi imkoniyatlar eshigini ochdi. Unda bildirilgan fikr va takliflar amaliy yechimlar ishlab chiqishga, soha faoliyatini samarali yo‘naltirishga xizmat qiladi. Tadbirkorlar o‘rtasidagi hamkorlikni kuchaytirib, innovatsion g‘oyalar va yangi tashabbuslarni hayotga tatbiq etishga undaydi.

Baxtiyar OTELBAYEV,
Xalq deputatlari Qo‘ng‘irot tuman Kengashi deputati