Iordaniya Hoshimiylar Podshohligi Podshohi Abdulla II ibn al-Husaynning mamlakatimizga davlat tashrifi, shubhasiz, ikki davlat  o‘rtasidagi aloqalarni yangi bosqichga ko‘tarishga xizmat qiladi. Bu tashrif nafaqat diplomatik muloqot darajasida, balki maʼnaviy-maʼrifiy jihatdan ham katta ahamiyatga ega.

Oliy martabali mehmon Samarqandda bo‘lib o‘tadigan oliy darajadagi muzokaralarning birinchi kunida Davlatimiz rahbari hamrohligida qadimiy shaharning tarixiy obidalarini ziyorat qildi. Jumladan, avvalo o‘zining meʼmoriy mukammalligi, naqshlari va tarixiy qiyofasi bilan butun islom olamida alohida o‘rin tutgan Shohi Zinda majmuasida bo‘ldi. Bu yerda Payg‘ambarimiz Muhammad alayhissalomning sahobalaridan biri Qusam ibn Abbos va boshqa mashhur arboblarning maqbaralari joylashgan. Maʼlumki, 2001 yilda ushbu majmua YUNESKOning Butunjahon merosi ro‘yxatiga kiritilgani ham uning beqiyos ahamiyatidan dalolat beradi.

Rasman Payg‘ambarimizning avlodlari hisoblangan Hoshimiylar sulolasi vakili bo‘lgan Iordaniya Podshohi Qusam ibn Abbos xotirasiga hurmat bajo keltirdi. Qurʼon tilovat qilindi.

Amir Temur maqbarasi ziyorati chog‘ida Iordaniya delegatsiyasiga buyuk bobomizning davlat boshqaruvidagi siyosati, harbiy mahorati va diplomatik aloqalari haqida keng maʼlumotlar berildi. Sohibqiron hayoti va faoliyati, uning davlati o‘z davrining eng ulkan mamlakati bo‘lgani mehmonlarda katta taassurot qoldirdi.

Davlat rahbarlari tashrif davomida Mirzo Ulug‘bek, Sherdor va Tillakori madrasalaridan iborat Registon majmuasini ham ziyorat qildilar. Asrlar davomida bu ulug‘vor maskan Sharq ilm-fanining markazi bo‘lib xizmat qilgan, yuzlab olim va tadqiqotchilarni yetishtirgan. O‘zining uyg‘un meʼmoriy qiyofasi va naqshlari bilan Registon Samarqandning “tashrif qog‘ozi”ga aylangan.

Mehmonlarga ushbu inshootlarning bunyod etilish tarixi, naqsh va bezaklarning o‘ziga xosligi, shuningdek, olib borilgan restavratsiya ishlari haqida ham batafsil maʼlumot berildi. 

O‘zbekiston-Iordaniya sammitining asosiy tadbirlari, shu jumladan oliy darajadagi muzokaralar bugun bo‘lib o‘tadi.

Albatta, Iordaniya Podshohining Samarqanddagi tarixiy obidalarni ziyorat qilishi xalqaro miqyosda O‘zbekistonning boy madaniy merosini yana-da keng targ‘ib etish imkonini berdi. Bu tashrif ikki mamlakat o‘rtasidagi do‘stona aloqalarni mustahkamlash bilan birga, ajdodlarimiz qoldirgan ilmiy-maʼnaviy merosning butun musulmon olami uchun naqadar qadrli ekanini ko‘rsatdi.

Alisher ARIPOV, 
partiya Markaziy kengashi bo‘lim boshlig‘i