Prezidentimiz tadbirkorlar bilan navbatdagi ochiq muloqoti avvalida ularni kasb bayrami va Mustaqillikning 34 yilligi bilan tabriklab, har bir soha, har bir hudud, har bir mahalladagi o‘zgarishlarda ularning hissasi katta ekanini qayd etdi.

Ilk ochiq muloqotdan buyon tadbirkorlarning 1 mingga yaqin tashabbusi qonunchilikka kiritilgani aytildi. Bu galgi, ya’ni beshinchi muloqotga tayyorgarlik davomida 26 ta sohaning 7 mingga yaqin vakillari bilan uchrashuvlar o‘tkazilgani, “koll-markaz” orqali ham 13 mingdan ziyod murojaat va tashabbuslar qabul qilingani ta’kidlandi.

O‘tgan haftada iqtisodiyotimizning muhim tarmoqlari bo‘lgan meva-sabzavotchilik, to‘qimachilik va yakka tartibdagi tadbirkorlik masalalari muhokama qilinib, zarur ko‘mak choralari belgilangani urg‘ulandi. Muloqot davomida tadbirkorlikning boshqa yo‘nalishlari bo‘yicha ham bir qator yangi tashabbuslar ilgari surildi.

Xususan, yil boshidan yurtimizga 7 millionga yaqin xorijiy sayyoh tashrif buyurgani, 15 million aholi mamlakat bo‘ylab ichki sayohatga chiqqani va kelgusi 3-4 yilda xorijiy sayyohlarning yillik oqimi kamida 15 million nafarga yetishi, shu bois turizmni rivojlantirish bo‘yicha yangi dastur boshlanishi qayd etildi.

Ushbu dastur doirasida, kelgusi uch yilda mehmonxona va turizm maskanlarini tashkil qilish uchun jami 5 ming gektar yer auksionga chiqarilishi, bunda mehmonxona qurmoqchi bo‘lgan tadbirkorlardan yerlarni sotib olish uchun to‘lov undirilmay, evaziga davlat shu summa bilan loyihaga ulushdor bo‘lib kirishi ta’kidlandi.

2026–2028-yillarda tijorat banklari tomonidan barcha toifadagi tadbirkorlik subyektlariga mehmonxona qurish uchun viloyat markazlari, Toshkent va Nukus shaharlari, turizmga ixtisoslashgan tuman (shahar)larda qurilayotgan mehmonxonalar uchun – 30 milliard so‘mgacha, boshqa hududlarda – 10 milliard so‘mgacha 7 yil muddatga 2 yillik imtiyozli davr bilan kreditlar ajratilishi belgilandi.

Har yili sayyohlarning eng ko‘p e’tiborini qozongan va nufuzli xalqaro platformalarda ijobiy e’tirof etilgan joylashtirish vositalarini aniqlash va taqdirlash bo‘yicha mukofot jamg‘armasi 1 million AQSH dollariga teng tanlov o‘tkazilishi ham ayni muddaodir.

Yangi mehmonxona uchun ko‘zda tutilgan subsidiyalar davlat obyektlari va xususiy binolarni sotib olib, ularda tashkil etilgan mehmonxonalarga ham berilishi, Toshkent shahri, viloyatlar markazi va yirik sayyohlik hududlaridan boshqa joylardagi mehmonxonalar turistik yig‘imdan ozod etilishi biznes vakillariga katta imkoniyat va rag‘batdir.

O‘ylaymizki, yurtimizda tadbirkorlikni rivojlantirish borasida amalga oshirilayotgan islohotlar, biznes vakillari uchun yaratib berilayotgan imkoniyatlar Yangi O‘zbekiston taraqqiyotini, istiqbolini ta’minlashga, davlatimizni boy qilishga, xalqimiz, oilalar hayotini farovon qilishga xizmat qiladi.

Jumanazar OTAJONOV,
Oliy Majlis Qonunchilik palatasidagi
“Milliy tiklanish” fraksiyasi aʼzosi