Mustaqilligimizning 34 yilligi arafasida Buxoro viloyatining Qorako‘l tumani “Eski Qala” mahallasida yangi maktab foydalanishga topshirildi. Tadbirda so‘zga chiqqan mahalla faollar zamonaviy maktabning bunyod bo‘lishida o‘zlari ishonch bildirib saylagan deputat Jahongir Shirinovning xizmati katta bo‘lganini eʼtirof etib, butun mahalla, pedagoglar nomidan minnatdorlik bildirdi.

Gap shundaki, joriy yilning fevral oyida Jahongir Shirinovning Qorako‘l tumani “Eski Qala” mahallasi aholisi bilan bo‘lgan uchrashuvida bir guruh faollar deputatga 18-sonli maktab uchun yangi bino qurish masalasida murojaat qilgan edilar. Haqiqatan ham maktab bugungi kun talablariga javob bermay qolgan, o‘quvchilar sonining yildan yilga ortayotgani esa yangi o‘quv binosiga ehtiyojni kun tartibiga chiqargan edi.

Albatta, yillar davomida ijrosi ortga surilib kelingan bu masalani hal qilish oson bo‘lmadi. Deputat tuman, viloyat, hatto tegishli vazirlikdagi masʼullarga ham masala hal bo‘lmagunicha tinchlik bermadi. Nihoyat, 3 milliard 600 million so‘m mablag‘ ajratilib, 300 o‘rinli 3 qavatli zamonaviy o‘quv binosi qurilishi boshlandi.  

J.Shirinov maktab bunyod bo‘lgunicha ham tinim bilmadi. Deyarli har oyda Qorako‘lga borib, qurilish jarayonini sifatli bajarish, binoni yangi o‘quv yiligacha topshirilishini nazorat qilib turdi. Qilingan harakatlar besamar ketmadi. Endi “Eski Qala” bolalari ham har jihatdan qulay sharoitlarga ega maktabda yangi o‘quv yilini boshlaydilar.