Prezidentimiz 20-avgust kuni tadbirkorlar bilan o‘tkazgan ochiq muloqotida ushbu soha rivojini yangi bosqichga ko‘tarishga xizmat qiladigan muhim taklif va tashabbuslarni ilgari surib, Yangi O‘zbekistonda biznes vakillarini himoya qilish, bu yo‘ldagi har qanday to‘siqlarni bartaraf etish vaqtinchalik emas, balki davomli, ortga qaytmas jarayon ekanini yana bir bor amalda ko‘rsatdi.

Davlatimiz rahbari nutqining avvalida bugun yurtimizda yaratilayotgan har bir ish o‘rni, qad ko‘tarayotgan korxonalar, xalqimizning og‘irini yengil qilayotgan xizmatlar, eksport bo‘layotgan har bir mahsulot tadbirkorlarning jasoratli mehnati, tashabbus va izlanishlari hosili ekanini ta’kidladi.

Sohibqiron bobomiz Amir Temurning “Azmi qat’iy, tadbirkor, hushyor, mard va shijoatli bir kishi mingta tadbirsiz va loqayd kishidan afzaldir”, degan ta’kidi bugun Yangi O‘zbekiston islohotlarida haqiqiy ma’noda o‘zining isbotini topyapti. Tadbirkor, tashabbuskor, izlanuvchan, ishning ko‘zini biladigan, xalq, davlat manfaatini o‘ylab, tinim bilmaydigan insonlar har jihatdan qo‘llab-quvvatlanyapti.

Ayniqsa, so‘nggi yillarda mamlakatimiz taraqqiyoti, istiqbolini ta’minlovchi asosiy kuch sifatida qaralayotgan tadbirkorlarga bo‘lgan munosabat butunlay o‘zgardi. Ularning muammolari, murojaat va takliflarini tinglab, samarali yechim topish tizimi yaratildi. Ortiqcha tekshir-tekshirishlar, cheklovlar, byurokratik to‘siqlarga barham berildi. Ilk ochiq muloqotdan buyon tadbirkorlarning 1 mingga yaqin tashabbusi qonunchilikka kiritildi.

Buning natijasida so‘nggi sakkiz yildagi statistikaga qaraydigan bo‘lsak, tadbirkorlik subyektlari soni 2017-yilda 275 mingtani tashkil qilgan bo‘lsa, 2024- yilda 456 mingtaga yetdi. Bugun ishli aholining 11 millioni, ya’ni 74 foizi aynan shu sohada xizmat qilmoqda. Birgina joriy yilning o‘zida 3 milliondan ziyod ish o‘rni ochildi. Yalpi ichki mahsulot hajmining yarmidan ko‘pi, sanoat va eksportning uchdan bir qismi ham biznes vakillari hissasiga to‘g‘ri kelmoqda.

Bu kabi natijalarning barchasi tadbirkor ishiga hech kim aralashmaydigan darajada huquqiy asos yaratilgani bilan bog‘liq. Ishbilarmonlikka oid kamchiliklar “kabinet”larda emas, ochiq muloqotlar orqali hal qilinadigan tizim yaratildi. “Tekshirsa — qo‘rqadi, qo‘rqsa — soliq to‘laydi”, degan qarash bilan ish yuritib bo‘lmasligi amalda isbotlandi.

Tadbirkor ham “soyada” ishlashdan ko‘ra qonuniy faoliyat ko‘rsatishni, faqat sog‘lom raqobat muhitigina manfaatli, foydali bo‘lishini tushunib yetdi. Natijada 139 mingta korxonada ish o‘rinlari 811 mingtaga ko‘paydi, 273 mingta korxona ish haqi fondini 22 foizga oshirdi.

Tadbirkorlar bilan navbatdagi uchrashuv ulkan bunyodkorlik ishlari boshlangan Yangi Toshkentda o‘tkazilganida ham ramziy ma’no bor. Ushbu megaloyiha “Inson qadri uchun” g‘oyasi asosida amalga oshirilayotgan islohotlarimiz odamlarning kundalik hayotida qanday aks etayotganining yaqqol isboti, yangilanish va taraqqiyot yo‘lidagi dadil qadamlarimizning yorqin timsoli bo‘ladi. Ya’ni, Yangi Toshkent tadbirkorlar uchun ham yangi imkoniyatlar, yangi g‘oya va yangi bozorlar maydoniga, innovatsiyalar va investitsiyalar markaziga aylanadi.

Albatta, deputat sifatida davlatimiz rahbari tomonidan bu borada ilgari surilgan taklif va tashabbuslar ijrosini ta’minlashga, qonunchilik asoslarini yanada takomillashtirib, tadbirkorlar manfaatini himoya qilishga mas’ulmiz. Zero, Yangi O‘zbekiston taraqqiyoti, istiqbolini ta’minlaydigan, davlatimizni boy qiladigan, eng asosiysi, xalqimiz, oilalar hayotini farovon qiladigan kuch bu — tadbirkorlardir.

Go‘zal SAMIYEVA,
Oliy Majlis Qonunchilik palatasidagi
“Milliy tiklanish” fraksiyasi aʼzosi