“Made in Uzbekistan” dunyo bozoridan mustahkam joy olmoqda

Insoniyat hayotiga hamon xavf solib turgan pandemiya, global taʼminotdagi uzilishlar, ayrim mintaqalarda taranglashgan geosiyosiy vaziyat dunyoda yuqori inflyatsiya va iqtisodiy taraqqiyotning sekinlashuviga sabab bo‘lmoqda. Bunday xatarlar o‘z eshiklarini dunyoga tobora kengiroq ochayotgan O‘zbekistonni ham chetlab o‘tayotgani yo‘q. Hukumatimizning shunday murakkab bir sharoitda baʼzan keskin choralar ko‘rishi, ochiq va pragmatik, o‘zaro ishonchga asoslangan izchil tashqi siyosati natijasida qiyinchiliklar bosqichma-bosqich yengib o‘tilyapti. Mamlakat iqtisodiyotida ijobiy ko‘rsatkichlar qayd etilmoqda.

O‘zbekiston Prezidenti Shavkat Mirziyoyev Oliy Majlis va O‘zbekiston xalqiga yo‘llagan Murojaatnomasi avvalida shu haqda gapirib, mamlakatimiz milliy rivojlanishning yangi davriga dadil qadam qo‘yayotgani, hayotimizning barcha jabhalarida ulkan o‘zgarishlar yuz berayotganini taʼkidladi.

Jumladan, yalpi ichki mahsulot hajmi ilk bor 80 milliard dollardan oshdi. Iiqtisodiyotimizga shu yilning o‘zida 8 milliard dollar to‘g‘ridan-to‘g‘ri xorijiy investitsiyalar kirib keldi, eksportimiz esa 19 milliard dollarga yetdi. Umuman, so‘nggi olti yilda investitsiyalar hajmini yalpi ichki mahsulotning 30 foizidan oshirishga erishdik.

Haqiqatan ham, so‘nggi yillarda mamlakatimizning tashqi iqtisodiy aloqalarida sezilarli o‘zgarishlar qayd etilmoqda. 2021- yilda O‘zbekistonning tashqi savdo aylanmasi 2020-yilga nisbatan 16,0 foizga o‘sgan bo‘lsa, joriy yilning to‘qqiz oyida bu ko‘rsatkich 2021-yilning mos davriga nisbatan 27,2 foizga oshdi. Bugungi kunda yurtimizdan 23 ta davlatga 86 turdagi, 56 davlatga esa barcha turdagi mahsulotlar eksport qilinmoqda.

Ayniqsa, bunda qishloq-xo‘jaligi mahsulotlarining ulushi yuqori bo‘lyapti. Statistik maʼlumotlarga ko‘ra, o‘tgan yili 2 mln 749 ming tonna meva-sabzavot eksport qilingan va bu 2020 yilga nisbatan 11 foizga ko‘p. 2022-yilda ham bu borada ijobiy ko‘rstkichlar qayd etilishi kutilyapti.

Yuqoridagi raqamlardan ko‘rinib turibdiki, “Made in Uzbekistan” yorlig‘i tushirilgan mahsulotlarimiz dunyo bozorida mustahkam joy olmoqda. Eng muhimi, xalqaro talablar darajasida ishlab chiqarilyotgan mahsulotlarimiz xorijlik isteʼmolchilarga ham manzur bo‘lyapti.

Murojaatnomada qayd etilganidek, joriy yilda boshlangan “Yangi O‘zbekiston – raqobatbardosh mahsulotlar yurti” dasturi o‘z natijasini ko‘rsatmoqda. Bir yilning o‘zida 2 mingga yaqin tadbirkorlar ilk bor tashqi bozorlarga chiqdi. Shundan kelib chiqib, 2023-yilda tayyor mahsulotlar eksportini qo‘shimcha 4 mlrd dollarga, Yevropa bozorlariga tekstil, elektr texnikasi, charm-poyabzal va boshqa tayyor mahsulotlar eksportini kamida 2 barobarga oshirish asosiy maqsad qilindi. Umuman, 2023-yilda eksport hajmi tariximizda ilk bor 23 mlrd dollardan oshirish belgilandi.

Buning uchun kelgusi yilda ham eksport qiluvchilarga transport va boshqa xarajatlari kompensatsiya qilinadi. Mahsulotlar eksporti bo‘yicha hozirgi 9 ta bosqichdan iborat bojxona rasmiylashtiruvi 3 barobar qisqartiriladi. Jahon savdo tashkilotiga aʼzo bo‘lish bo‘yicha asosiy muzokaralarni yakunlab, ichki qonunchilikni moslashtirish, yangi standartlarni joriy etish ishlari yana-da jadallashadi.

Yorqin MALIKOV,

xalq deputatlari Olmazor tuman Kengashi deputati,

O‘zbeksiton Eksportchilar uyushmasi raisi o‘rinbosari