Bizning o‘tmishimiz ham, bugunimiz va kelajagimiz ham bir

Prezidentimizning Oliy Majlis va xalqimizga yo‘llagan Murojaatnomasida davlatimiz siyosati negizini tashkil etuvchi inson qadrini ulug‘lash, ijtimoiy sohalarni rivojlantirish, xalqimizning turmush farovonligini oshirish yo‘nalishlarida muhim vazifalar belgilanganini ko‘ramiz.

Jumladan, davlatimiz rahbari ish haqi, pensiya va nafaqalar miqdorini, aholi jon boshiga daromadlarni oshirish siyosati izchil davom etishini taʼkidladi. Binobarin, yurtimizda pensiya va ijtimoiy nafaqalar miqdori minimal isteʼmol xarajatlaridan kam bo‘lmagan darajaga olib chiqilgani, 2017-yilda kam taʼminlangan 500 ming oila ijtimoiy yordam olgan bo‘lsa, bugunga kelib 2 milliondan ortiq oilalarga ko‘mak berilayotgani chin maʼnoda insonparvarlikning yorqin namunasidir.

Murojaatnomada hech bir soha yo‘qki, eʼtibordan chetda qolgan bo‘lsa. Tibbiyot deysizmi, boshqaruv, qonunchilik... Davlatimiz rahbari «Avval-inson, keyin jamiyat va davlat» degan g‘oyani Konstitutsiyamiz va qonunlarimizga ham, kundalik hayotimizga ham chuqur singdirishimiz kerak», deya urg‘u berdi. Va bu orqali milliy davlatchiligimiz asoslari mustahkamlanishiga to‘xtaldi.

Oltita ustuvor yo‘nalish mujassam topgan Murojaatnomaning birinchi yo‘nalishi ixcham va samarali davlat boshqaruv tizimiga o‘tish bilan bog‘liq. Prezidentimiz birinchi bosqichda vazirliklar isloh qilinishi, hukumat ish uslubi tubdan o‘zgarishini taʼkidlar ekan, Imom Moturidiy bobomizning «elu yurt bilan hamdard bo‘lib yashagin, toki xalq hamisha sen bilan birga bo‘lgay», deya hayotiy hikmatini keltirdi. Ikkinchi yo‘nalishga to‘xtalar ekan, birinchi navbatda, eʼtibor Yangi O‘zbekiston uchun eng katta investitsiya bo‘lgan taʼlimni qo‘llab-quvvatlashga qaratilishini qayd etdi. Najot taʼlimda, tarbiyada, bilimda ekani, barcha ezgu maqsadlarga bilim va tarbiya tufayli erishish mumkinligi, 2023-yildan maktab taʼlimini xalqaro taʼlim dasturlari asosida butunlay isloh qilinishi aytildi. Darhaqiqat, taraqqiyotga yo‘l taʼlimdan boshlanadi. Shunday ekan, yosh avlodni munosib vorislar qilib tarbiyalay olsak, biz orzu qilgan jamiyatni, har tomonlama yuksak davlatni yaratamiz.

Maʼlumki, Vatan ichidagi kichik vatan sanalgan mahalla – xalq ko‘zgusi. Murojaatnomada keltirilganidek, endilikda mahalla o‘z muammolarini o‘zi mustaqil hal qilishi uchun «Mahalla byudjeti» tizimi joriy qilinishi va 1-yanvardan boshlab mol-mulk va yer soliqlarning bir qismi mahallaning o‘zida qolishi ayni muddao bo‘ldi. Bundan tashqari aholi uchun uy-joylar qurish hajmi 1,5 barobar oshib, 90 mingga yetkazilishi va ikki yil oldin boshlangan imtiyozli shartlar asosida ipoteka kreditlari berish davom ettirilib, «Mening birinchi uyim» yangi ipoteka dasturi joriy qilinayotgani yosh va ehtiyojmand oilalar quvonchiga quvonch qo‘shadi.

Nazarimizda, Murojaatnomada ilgari surilgan vazifalar haqchilligi va xalqchilligi bilan insonlar diliga birdek kirib bordi. Ayniqsa, Prezidentimizning Qoraqalpog‘iston yutug‘i – O‘zbekiston yutug‘i, Qoraqalpog‘iston tashvishi – bu butun O‘zbekiston tashvishi ekanini taʼkidlab, «Bizning ezgu maqsadimiz – birgalikdagi mehnatimiz bilan Yangi O‘zbekistonda har tomonlama rivojlangan, obod va farovon Yangi Qoraqalpog‘istonni bunyod etishdir», degan so‘zlari har bir qoraqalpog‘istonlikni to‘lqinlantirib yuborgani rost.

Shuni ishonch bilan aytamizki, azaldan do‘stu birodar bo‘lib, etu tirnoq kabi bir bo‘lib ketgan qoraqalpoq va o‘zbek xalqi yakdilligiga hech qanday kuch taʼsir ko‘rsata olmaydi. Zotan, bizning o‘tmishimiz bir, bugunimiz ham, kelajagimiz ham bir.

Ulug‘bek JALMENOV,

Qoraqalpog‘iston Respublikasi Juqorg‘i Kengesi deputati, senator