Yangiliklar


328

Ijtimoiy soha xarajatlarining 45 foizi taʼlimga yo‘naltirilmoqda

“Milliy tiklanish” demokratik partiyasining Oliy Majlis Qonunchilik palatasidagi fraksiyasi yig‘ilishi boshlandi va deputatlar “2022-yil uchun O‘zbekiston Respublikasining davlat byudjeti to‘g‘risidagi”gi qonun loyihasini muhokama qilishga kirishdi.

Tegishli vazirlik va idora rahbarlari ishtirokida o‘tayotgan yig‘ilishda taʼkidlanganidek, qonun loyihasida kelgusi yil uchun Davlat byudjeti daromadlari 200 trln. so‘m yoki YAIMga nisbatan 23,8 foiz miqdorida prognoz qilinmoqda. Shundan kelib chiqib, 2022-yil uchun Davlat byudjeti xarajatlari 214,8 trln. so‘m yoki YAIMga nisbatan 25,6 foiz miqdorida belgilanmoqda.

Kelgusi yilda ham ijtimoiy soha xarajatlari yana oshiriladi va uning qariyb 45 foizi taʼlimga yo‘naltirilmoqda. Jumladan, maktabgacha taʼlimga tarbiyalanuvchilar qamrovi oshganligi uchun 8,6 trln. so‘m, xalq taʼlimiga 30,8 trln. so‘m, o‘rta maxsus va oliy taʼlimga esa 7,5 trln. so‘m ajratish ko‘zda tutilmoqda.

Shuningdek, olis va chekka hududlarda 1 600 ta bog‘cha tashkil etish uchun 1,5 trln so‘m subsidiya va kompensatsiya ajratilishi, maktablarda taʼlim sifatini oshirish, yangi avlod darsliklarni ishlab chiqish va chop etish uchun Kitob jamg‘armasiga 605 mlrd. so‘m, maktablarni internet bilan taʼminlash ishlarini yakuniga yetkazish uchun 152 mlrd. so‘m ajratish rejalashtirilmoqda.