Yangiliklar


682   08-02-2023

Navoiyxonlik kechlari boshlandi

Buyuk mutafakkir, atoqli davlat va jamoat arbobi, yurt obodligi, xalq farovonligi, maʼnaviyat va madaniyat rivojiga beqiyos hissa qo‘shgan alloma, sheʼriyat mulkining sultoni Alisher Navoiy tavallud topganiga 582 yil to‘ladi. Shu munosabat bilan yurtimiz bo‘ylab bayramona kayfiyat hukm surmoqda. Adabiy, maʼnaviy-maʼrifiy tadbirlar, davra suhbatlari, g‘azalxonlik kechalari o‘tkazilyapti.

Partiyaning Toshkent shahar Kengashi tashabbusi bilan Alisher Navoiy nomidagi Toshkent davlat o‘zbek tili va adabiyoti universitetida ana shunday kechalardan biri tashkil qilindi. “Navoiy ijodi kelajak avlod uchun bebaho meros” shiori ostida o‘tgan tadbirda Navoiyshunos olimlar, partiya aʼzolari, deputatlar hamda talaba yoshlar ishtirok etdi.

Tadbirda so‘zga chiqqanlar Alisher Navoiyning boy ilmiy-ijodiy merosi haqida gapirib, alloma avlodlarga ulkan, bebaho, tuganmas adabiy meros qoldirganini taʼkidladilar.

Tadbir davomida talabalarning teatrlashtirilgan sahna ko‘rinishlari, musiqiy chiqishlari namoyish qilindi. Umuminsoniy g‘oyalar targ‘ib qilingan g‘azallaridan namunalar o‘qildi.

 

MTDP Toshkent shahar Kengashi matbuot xizmati