Yangiliklar


317

Byudjetdan turizm targ‘iboti uchun nega mablag‘ ajratilmayapti?

“Milliy tiklanish” demokratik partiyasining Oliy Majlis Qonunchilik palatasidagi fraksiyasi yig‘ilishi bo‘lib o‘tdi va deputatlar “2022-yil uchun O‘zbekiston Respublikasining davlat byudjeti to‘g‘risida”gi qonun loyihasini muhokama qildilar.

Tegishli vazirlik va idora rahbarlari ishtirokida o‘tgan yig‘ilishda taʼkidlanganidek, kelgusi yilda ham ijtimoiy soha xarajatlari yanada oshiriladi va uning qariyb 45 foizi taʼlimga yo‘naltiriladi. Jumladan, maktabgacha taʼlimga tarbiyalanuvchilar qamrovi oshganligi uchun 8,6 trln. so‘m xalq taʼlimiga, 30,8 trln. so‘m o‘rta maxsus va oliy taʼlimga esa 7,5 trln. so‘m ajratish ko‘zda tutilmoqda.

Shuningdek, olis va chekka hududlarda 1 600 ta bog‘cha tashkil etish uchun 1,5 trln so‘m subsidiya va kompensatsiya ajratilishi, maktablarda taʼlim sifatini oshirish, yangi avlod darsliklarni ishlab chiqish va chop etish uchun Kitob jamg‘armasiga 605 mlrd. so‘m, maktablarni internet bilan taʼminlash ishlarini yakuniga yetkazish uchun 152 mlrd. so‘m ajratish rejalashtirilmoqda.

Fraksiya aʼzolari partiya maqsad va vazifalaridan kelib chiqqan holda qonun loyihasining har bir moddasini sinchiklab tahlil qildilar va hukumat vakillarini ayrim masalalarda savolga tutdi.

Yig‘ilishda taʼkidlanganidek, O‘zbekiston Respublikasi Prezidentining shu yil 25-avgustdagi 5232-sonli qarorga muvofiq, turistik yig‘imlar ikki yil muddatga to‘xtatilgan edi. Qonun loyihasida esa ushbu yo‘qotiladigan mablag‘ni qoplash nazarda tutilmagan. Endi soha targ‘iboti ishlari qaysi manbalardan qoplanadi, bu turizm rivojiga salbiy taʼsir ko‘rsatmaydimi?

Turizm va sport vaziri o‘rinbosari Abdulaziz Aqqulov bu savolga javob qaytarar ekan, 2019-yilda ushbu yig‘imdan 92 mlrd. so‘m mablag‘ tushgani va uning 62,6 mldr. so‘mi turizm targ‘ibotiga sarflanganini maʼlum qildi. Uning aytishicha, mamlakatimizga kelayotgan sayyohlarning 11 foizi turoperatorlar tomonidan jalb qilinadi. Qolgan 89 foizi esa aynan targ‘ibot-tashviqot natijasida yurtimizga tashrif buyuradi. Ko‘rinib turibdiki, turizm rivojida targ‘ibotning o‘rni juda ham muhim.

– Haqiqatan ham targ‘ibotsiz turizmni rivojlantirib bo‘lmaydi. Pandemiyadan so‘ng dunyoda sayyohlarni jalb qilishga bo‘lgan eʼtibor kundan kunga kuchayayotgan bir sharoitda buning uchun mablag‘ ajratmasak, turistlar soni keskin kamayishi mumkin. Aslida targ‘ibotni turfirmalarning o‘zi amalga oshirishi lozim. Lekin ular hali bu borada juda ham zaif. Shu bois, “Milliy tiklanish” partiyasi fraksiyasi yalpi yig‘ilishda ushbu masalani albatta ko‘taradi, – dedi fraksiya rahbari Alisher Qodirov.

Fraksiya aʼzosi Kozimjon Tojiyev Qonun loyihasida Madaniy meros obyektlarini restavratsiya qilish, tiklash va arxeologik ishlar uchun 75,0 mlrd. so‘m yo‘naltirilayotgani, ammo bu joriy yilda ajratilgan mablag‘dan atigi 2 foiz ko‘pligiga eʼtibor qaratdi.

Tegishli idora vakili bu maqsadlar uchun boshqa manbalardan ham katta miqdorda mablag‘ jalb qilinayotganini taʼkidladi. 

– Davlatimiz rahbarining 4095-sonli qarorida mehmonxonalar qurish va jihozlash uchun investorlar xarajatining bir qismi davlat byudjetidan qoplanishi ko‘rsatilgan. Ammo qonun loyihasida ushbu xarajatlar uchun mablag‘lar ajratilmayapti. Byudjetdan mablag‘ ajratilmasa, bu xarajatlar qanday qoplanadi?

Moliya vazirligi vakili fraksiya aʼzosi Jahongir Abdurasulovning ushbu savoliga quyidagicha javob qaytardi:

– Ko‘p yulduzli mehmonxonalarni qurish va jihozlash endi katta investorlar tomonidan amalga oshirilishi belgilanmoqda. Shu bois, bu maqsadlar uchun ajratilgan mablag‘larni endi ijtimoiy sohalar rivojiga yo‘naltirish ko‘zda tutilmoqda.Qizg‘in bahs-munozaralarga sabab bo‘lgan fraksiya yig‘ilishda deputatlar byudjet xarajatlari ochiq-oshkora bo‘lishi, vazirliklar, davlat idoralari uning har bir so‘midan samarali foydalanish lozimligi bo‘yicha o‘z fikr-mulohazalarini bildirdilar va qonun loyihasini birinchi o‘qishda maʼqulladilar.