Navoiyni anglash juda oson, faqat uni qayta-qayta o‘qish kerak

“Milliy tiklanish” demokratik partiyasi Markaziy va hududiy Kengashlari aʼzolari, Oliy Majlis Qonunchilik palatasi hamda mahalliy Kengash deputatlari, faol yoshlar sheʼriyat mulkining sultoni Alisher Navoiy tavalludining 582 yilligi munosabati bilan O‘zbek milliy akademik drama teatrida ijodiy uchrashuv o‘tkazdi. So‘ngra otaxon teatrda Uyg‘un va Izzat Sulton asarlari asosida sahnalashtirilgan “Alisher Navoiy” spektaklini tomosha qildilar.

– Navoiy bobomiz yaratgan asarlar xalqimiz maʼnaviy dunyosining eng katta boyligi hisoblanadi. Birgina besh dostondan iborat “Xamsa” asari dunyoning 64 ta tiliga tarjima qilingan. Bobomiz 16 ta janrda ijod qildi va o‘zbek tili adabiyotiga asos soldi. Navoiyni anglash juda ham oson. Faqat uni qayta-qayta o‘qish kerak. G‘azallari mag‘zini chaqib, yod olish lozim, – dedi Oliy Majlis Qonunchilik palatasi deputati, shoira Farida Afruz.

Haqiqatan ham, o‘zbek adabiyoti tarixida Alisher Navoiychalik hech kim chuqur iz qoldirmagan. Bobomizning badiiy va ilmiy, diniy-falsafiy asarlari mana qariyb olti asrki o‘z ahamiyatini yo‘qotgani yo‘q, yo‘qotmaydi ham. Uning qalamiga mansub “Xamsa”, “Xazoyin ul-maoniy”, “Lison ut-tayr”, “Mahbub ul-qulub” kabi insonparvarlik, odamiylik va xalqparvarlik, ezgulik va do‘stlikni ulug‘lovchi asarlari xalqimiz, ayniqsa, yoshlarimiz maʼnaviyatini boyitishda, vatanparvarlik ruhida tarbiyalashda muhim ahamiyat kasb etmoqda.

Tadbirda ishtirok etgan partiya Markaziy kengashi raisi o‘rinbosari Mirodil Abdurahmonov Alisher Navoiy haqida gapirar ekan, maktablarda, oliy taʼlim dargohlarida Navoiyni o‘qitishga yetarlicha eʼtibor berilmayotgani yoki nomiga o‘qitilayotganini, bugun Navoiydan qolgan adabiy meros bilan maqtangandan ko‘ra, shular haqida jiddiy bosh qotirishimiz lozimligini taʼkidladi.

– Navoiyga bugun butun millat yuz burishi lozim. Aks holda Navoiy bobomizni yo‘qotib qo‘yishimiz mumkin degan xavotir ham yo‘q emas, – dedi M.Abdurahmonov.

Rejissyor Rustam Hamidov tomonidan sahnalashtirilgan, Behzod Muhammadkarimov, Dinoza Kubayeva, Erkin Komilov, Muhammadali Abduqunduzov kabi taniqli aktyorlar tomonidan Navoiy va uning davri shaxslari talqin qilingan “Alisher Navoiy” spektakili barchaga birdek manzur bo‘ldi.

Alisher Kasimov, Sardor Mullajonovlar tayyorladi