Prezident bilan uchrashuvdan taʼsirlanib qog‘ozga tushirganlarim

Taraqqiyotning yakkayu yagona to‘g‘ri yo‘li – taʼlim sifatini oshirishdir

Prezidentimiz Shavkat Mirziyoyevning Farg‘ona vodiysi, xususan, Namangan viloyatiga tashrifi barcha yurtdoshlarimiz hayotida tom maʼnoda yangi sahifalar ochish uchun mustahkam zamin yaratdi, desak mubolag‘a bo‘lmaydi.

Davlatimiz rahbarining viloyat markazidagi “Barkamol avlod” kichik sanoat zonasida tadbirkorlar bilan uchrashuvi, Davlatobod tumanidagi “Fazman tekstil” korxonasi faoliyati bilan tanishuvi hamda ijtimoiy-iqtisodiy rivojlantirish rejalari muhokamasi yuzasidan viloyat faollari bilan o‘tkazgan ochiq muloqotida bildirilgan fikr-mulohazalari esa turli soha va tizimlarda mehnat qilayotgan yurtdoshlarimiz uchun tom maʼnoda rag‘bat vazifasini bajardi. Tadbirkorlar, xotin-qizlarni ijtimoiy qo‘llab-quvvatlash, yoshlar bandligini taʼminlash, Namanganni  tadbirkorlar yurti, kichik va o‘rta biznes markaziga aylantirishga oid yangi takliflar viloyat rahbarlari uchun ham, oddiy Namangan ahli uchun ham o‘ziga xos vazifa bo‘ldi.  

Ayniqsa, Davlatimiz rahbarining “Yangi O‘zbekiston – yoshlar ziyo maskani” axborot-kutubxonasiga tashriflari, ilm ahli, kitobga oshufta qalblarga motivatsiya berdi, desam xato bo‘lmaydi. Biz ham imkoniyatdan foydalanib, Prezidentimizga viloyat kutubxonasining faxrli aʼzolik ID kartasi hamda buyuk islohotchi Li Kuan Yuning Singapur tarixiga bag‘ishlangan “Uchinchi dunyodan birinchi dunyoga” nomli kitobini sovg‘a qildik.

Majmuamiz 2021-yilda foydalanishga topshirilgan bo‘lib, bugungi kunda 70 minglik kitob fondiga ega. Ziyo maskani jahondagi yirik elektron kutubxonalar tarmog‘iga ham ulangan va u orqali xorijiy adabiyotlardan ham bemalol foydalanishi mumkin. Eng muhimi barcha jarayonlar elektron tarzda amalga oshiriladi.

Birinchi qavatda 12 yoshgacha bo‘lgan bolalar hamda ko‘zi ojizlarga mo‘ljallangan o‘qish zali bo‘lib, bu yerda kichkintoylarning ijodiy tasavvurlarini boyitadigan zamonaviy jihozlar qo‘yilgan. Ikkinchi va uchinchi qavatlarda umumiy o‘quv zallari, yerto‘lada esa arxiv joylashgan. Bu yerda yoshlar axborot texnologiyalarini ham o‘rganishlari mumkin.

Davlatimiz rahbari aynan shu yerda namanganlik yoshlar bilan muloqot qildilar. Aholini, ayniqsa, yoshlarni kutubxonalarga yana-da ko‘proq jalb etish, kitobxonlikni rivojlantirish uchun yana qanday ishlarni amalga oshirish kerakligi xususida yoshlarning taklif va tashabbuslari bilan qiziqdilar.

Quvonarli jihati shundaki, Prezidentimiz bunday ziyo maskanlarini taʼlimning barcha bosqichlari bilan bog‘lash lozimligini taʼkidladi. Xususan, mutasaddilarga maktabdan tortib, kollej, oliy taʼlim muassasalarigacha bir-birini uzviy bog‘laydigan, o‘z atrofida yigit va qizlarni sanʼat, madaniyat, ilm-fan bilan qamrab oladigan majmuaviy xarakterga ega maskanlarni yaratish topshirig‘ini berdilar.

– Namangan buyuk allomalar, usta tadbirkorlar yurti. Bugun ham yoshlar iqtisodiyot, sanʼat, sport sohalarida katta yutuqlarga erishmoqda. Bularni eshitib, ko‘rib, xursand bo‘laman. Yoshlarimiz uchun yana-da ko‘proq imkoniyatlar tashkil qilishni o‘ylayman, – dedi Prezidentimiz.

Tashrif davomida Yoshlar ziyo maskanida chet tillarini bepul o‘rganish imkonini beruvchi “Ibrat farzandlari” loyihasi taqdimoti ham o‘tkazildi. Prezidentimiz viloyat yoshlari bilan uchrashuvda jamiyatda faol, bugungi islohotlarga o‘zini daxldor deb biladigan yoshlar tashabbuslarini  rag‘batlantirish, yurtimizdagi barcha yoshlar haqida birdek qayg‘urib, ular uchun yana-da keng imkoniyatlar yaratish, yangi avlod vakillarining taklif va tashabbuslarini qo‘llab-quvvatlash bo‘yicha mutasaddilarga ko‘rsatmalar berib,  “O‘zbekistondagi har bir yosh, yaxshisi ham, yomoni ham, bilimi bor, yo‘g‘i ham mening farzandlarim, ular uchun hamma sharoitni qilib berishimiz kerak, toki yoshlar o‘z qiziqishlarini atrofdan izlamasin, iqtidori va salohiyatini mana shunday maskanlarda kamol toptirsin”, – deya taʼkidladilar.

Ishonchimiz komilki, Davlat rahbari ishtirokidagi bunday amaliy uchrashuvlar so‘zsiz samara beradi, yoshlarga kuch va g‘ayrat ulashadi. Yangi O‘zbekiston taraqqiyotining yakkayu yagona to‘g‘ri yo‘li – taʼlim sifatini oshirishda har bir hududda, markazlardan tortib, chekka qishloqlarda ham zamonaviy Yoshlar ziyo maskanlarini tashkil etishga qaratilayotgan eʼtibor esa albatta o‘z mevasini beradi.

Dilnoza AZIZOVA,

 Namangan viloyati Kengashi raisi,

“Yangi O‘zbekiston – yoshlar ziyo maskani” axborot-kutubxonasi rahbari